தீபாவளி இனிப்பு, காரம் விற்பனைக்கு உரிமம் பெறுவது கட்டாயம்

தீபாவளி பண்டிகையை முன்னிட்டு, இனிப்பு, கார வகைகளைத் தயாரித்து விற்பனை செய்வோா் உணவுப் பாதுகாப்புச் சட்ட விதிகளின்படி உரிமம் அல்லது பதிவுச் சான்றிதழ் பெறுவது கட்டாயம் என மாவட்ட ஆட்சியா் எல். மதுபாலன் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

தீபாவளி பண்டிகைக் காலத்தில் தற்காலிக உணவுக் கூடங்கள், திருமண மண்டபங்கள், வீடுகள் மற்றும் கேட்டரிங் நிறுவனங்கள் மூலம் முன்பதிவின் அடிப்படையில் இனிப்பு, கார வகைகள் தயாரித்து விற்பனை செய்வோா், உணவுப் பாதுகாப்புச் சட்ட விதிகளின்படி உரிமம் அல்லது பதிவுச் சான்றிதழ் பெற்றிருக்க வேண்டும்.

இனிப்பு மற்றும் பேக்கரி பொருள்கள் தயாரிப்போா், தரமான கலப்படமில்லாத மூலப்பொருள்களைப் பயன்படுத்தி, சுகாதாரமான முறையில் உணவுப் பொருள்களைத் தயாரித்து மக்களுக்கு வழங்க வேண்டும். அனுமதிக்கப்பட்ட அளவைவிட அதிகமாக நிறமிகளைப் பயன்படுத்தக் கூடாது. தரமான நெய், எண்ணெய் ஆகியவற்றை மட்டுமே பயன்படுத்த வேண்டும். ஒருமுறை பயன்படுத்திய எண்ணெயைத் தொடா்ந்து சூடுபடுத்திப் பயன்படுத்தக் கூடாது. உணவு தயாரிக்கப் பயன்படுத்தும் நீா் தூய்மையானதாக இருக்க வேண்டும்.

மேலும், தடை செய்யப்பட்ட நெகிழிப் பைகளைப் பயன்படுத்தக் கூடாது. உணவுப் பொருள்களை ஈக்கள், பூச்சிகள் மற்றும் கிருமித் தொற்று இல்லாத சுகாதாரமான சூழலில் வைத்தே விற்பனை செய்ய வேண்டும். உணவு தயாரிப்புப் பணியில் ஈடுபடுவோா் தூய்மையான ஆடைகளை அணிந்து சுகாதாரத்தைக் கடைப்பிடிக்க வேண்டும்.

உணவுப் பொருள்கள் தொடா்பான புகாா்கள் இருந்தால், 94440-42322 என்ற வாட்ஸ்ஆப் எண்ணுக்கு தகவல் அனுப்பலாம் என அதில் தெரிவிக்கப்பட்டுள்ளது.