ஆத்தூரில் ஆயில் பந்துகள் மூலம் கொசு உற்பத்தியைத் தடுக்க நடவடிக்கை

ஆத்தூர் நகராட்சிப் பகுதியில் வசிஷ்ட நதி, மழைநீர் குட்டைகள் மற்றும் சாக்கடைகளில் கொசுப் புழுக்கள் உற்பத்தியாவதைத் தடுக்க ஆயில்பந்துகள் வீசப்பட்டன. 
மாவட்ட ஆட்சியர் ரோகிணி ராம்தாஸ் உத்தரவின்படி,  ஆத்தூர் நகராட்சி ஆணையர் க.கண்ணன் மேற்பார்வையில் சுகாதார அலுவலர் திருமூர்த்தி தலைமையிலான சுகாதார ஆய்வாளர்கள் மற்றும் துப்புரவுப் பணியாளர்கள் வசிஷ்ட நதியில் உள்ளகுட்டைகள், சாக்கடை போன்ற பகுதிகளில் ஆயில் பந்துகளை வீசினர். இதனால் தேங்கியுள்ள நீரில் ஆயில் பரவி கொசுப்புழுக்கள் முழுவதும் அழிந்து விடும்.  நகராட்சி பகுதியில் உள்ள 33 வார்டுகளிலும்  ஆயில் பந்துகள் வீசப்படுவது தொடர்ந்து செயல்படுத்தப்படும் என்று ஆணையர் க.கண்ணன் தெரிவித்தார். இந்தப் பணி பொதுமக்களிடையே வரவேற்பை பெற்றுள்ளது.