வாழப்பாடியில் இன்று செல்வமுத்து மாரியம்மன் கோயில் தேரோட்டம்

வாழப்பாடியில் செல்வமுத்து மாரியம்மன் கோயில் தேரோட்ட விழா  வியாழக்கிழமை (ஆக.9) நடைபெறுகிறது.
வாழப்பாடியில் பிரசித்தி பெற்ற செல்வமுத்து மாரியம்மன் கோயில் தேர்த் திருவிழா, 10 ஆண்டுகளுக்கு பிறகு நடைபெற்று வருகிறது. இதற்கிடையே செவ்வாய்க்கிழமை மாலை,  முன்னாள் முதல்வர் கருணாநிதி மறைந்ததால், புதன்கிழமை நடைபெறவிருந்த அனைத்து நிகழ்ச்சிகளும் ரத்து செய்யப்பட்டன. இதையடுத்து அனைத்து நிகழ்வுகளும் வியாழக்கிழமை நடைபெறுகிறது. அதிகாலை 5.30 மணிக்கு சுவாமி திருக்கல்யாணம், 7 மணிக்கு மேல் கரகம் எடுத்தல், அலகுக் குத்தல் மற்றும் மாவிளக்கு ஊர்வலம் நடைபெறுகிறது.
காலை 7.30 மணிக்கு சுவாமி திருத்தேர் ரதமேறுதல் நிகழ்ச்சியும், பட்டக்காரர் மற்றும் செல்லியம்மன் தேர் கட்டளைதாரர்கள் முறை அழைத்தலும்,  8 மணிக்கு மேல் ஆடு, கோழி பலியிட்டு பக்தர்கள் அம்மனுக்கு நேர்த்திக் கடன் செலுத்துதலும் நடைபெறுகிறது. பகல் 11 மணிக்கு செல்லியம்மன் தேரோட்டம்,  12.30 மணிக்கு மாரியம்மன் திருத்தேர் நிலைபெயர்த்தலும், பகல் 1 மணிக்கு கோயிலில் இருந்து அக்ரஹாரம் ராஜவீதியில் தேரோட்டம் புறப்பட்டு மாலை 6 மணிக்கு வைத்திப் படையாச்சி தெருவில் நிலை நிறுத்தலும் நடைபெறுகிறது. வெள்ளிக்கிழமை முதல் திங்கள்கிழமை வரையிலான நிகழ்ச்சிகளில் எவ்வித மாற்றமும் இல்லையென, ஊர் பெரியதனக்காரர்கள் மற்றும் விழாக்குழுவினர் தெரிவித்துள்ளனர்.