தம்மம்பட்டியில் அனைத்துக் கட்சியினர் உண்ணாவிரதம்

தம்மம்பட்டியில் பேரூராட்சி நிர்வாகத்தைக் கண்டித்து திமுக, காங்கிரஸ், மதிமுக உள்ளிட்ட கட்சியினர் பங்கேற்ற உண்ணாவிரதம் செவ்வாய்க்கிழமை பேருந்து நிலையத்தில் நடைபெற்றது.
தம்மம்பட்டி பேரூராட்சியின் புதிய அலுவலகக் கட்டட சுவற்றுக்கு கட்டப்பட்ட 2 மாதத்திலேயே ரூ. 7.75 லட்சத்தில் வர்ணம் பூச  விடப்பட்ட டெண்டரை ரத்து செய்யக் கோரியும்,  தம்மம்பட்டி பேருந்து நிலைய சுங்க வசூலை 3  வருடமாக முறைகேடாக நடத்தியதைக் கண்டித்தும், பேரூராட்சியில் பணிபுரிந்து ஓய்வுபெற்ற மரணமடைந்தவர்களின் குடும்பத்தினருக்கு சேமநல நிதி வழங்காமல் இருப்பதைக் கண்டித்தும் அனைத்துக் கட்சியினர் சார்பில் உண்ணாவிரதப் போராட்டம் தம்மம்பட்டி பேருந்து நிலையத்தில் செவ்வாய்க்கிழமை நடைபெற்றது.
காலை 11 மணிக்குத் தொடங்கிய உண்ணாவிரதத்துக்கு தம்மம்பட்டி நகர திமுக பொறுப்பாளர் சண்முகம் தலைமை வகித்தார். காங்கிரஸ் கட்சியின் சேலம் மாவட்ட துணைத் தலைவர் திருச்செல்வம் முன்னிலை வகித்தார்.
சிறப்பு பங்கேற்பாளராக சேலம் மாநகராட்சி முன்னாள் மேயர் ரேகா பிரியதர்ஷிணி பங்கேற்றார். மாலை வரை நடைபெற்ற உண்ணாவிரதத்தில் திமுக, காங்கிரஸ், மதிமுக, திக, இந்திய  கம்யூனிஸ்ட், மார்க்சிஸ்ட் கம்யூனிஸ்ட், விடுதலைச் சிறுத்தைகள் கட்சியினர், த.மா.கா. பிரமுகர்கள் பங்கேற்றனர்.