மணல் லாரி சங்க நிர்வாகிகளிடம் பணம் கேட்டு மிரட்டியதாக 6 பேர் கைது

சேலத்தில் மணல் லாரி சங்க நிர்வாகிகளிடம் பணம் கேட்டு மிரட்டியதாக 6 பேரை போலீஸார் கைது செய்தனர்.
சேலம் அன்னதானப்பட்டி பகுதியில் மண்ணின் மைந்தர்கள் கழகம் என்ற அமைப்பை ஷார்ப் முரளி மற்றும் நிர்வாகிகள் நடத்தி வருகின்றனர்.
இந்த நிலையில் மண்ணின் மைந்தர்கள் கழகத்தைச் சேர்ந்த சிலர் திங்கள்கிழமை சீலநாயக்கன்பட்டி பகுதியில் உள்ள சேலம் மாநகர மணல் லாரி உரிமையாளர்கள்  சங்கத்துக்குச் சென்றதாகத்
தெரிகிறது.
அப்போது அங்குள்ள நிர்வாகிகளிடம் மாதந்தோறும் மாமூல் தர வேண்டும் என மிரட்டியதாகத் தெரிகிறது. இதுதொடர்பாக, சேலம் மாநகர காவல் ஆணையாளர் சங்கரை சந்தித்து புகார் செய்யப்பட்டது. புகாரின்பேரில் அன்னதானப்பட்டி காவல் ஆய்வாளர் குமார் விசாரித்து வந்தார்.
இதையடுத்து மண்ணின் மைந்தர்கள் கழகத்தின் சேலம் மாநகரச் செயலாளர் ஏழுமலை மற்றும் நிர்வாகிகள் கார்த்திக், சங்கர், ராமலிங்கம், குணா, கதிரவன்  ஆகிய 6 பேரை போலீஸார் கைது
செய்தனர்.
கைதான 6 பேரும் சேலம் நீதிமன்றத்தில் ஆஜர்படுத்தப்பட்டு சேலம் மத்திய சிறையில் அடைக்கப்பட்டனர். இந்த மிரட்டல் தொடர்பாக மண்ணின் மைந்தர்கள் கழகத்தின் நிறுவனர் ஷார்ப் முரளி மற்றும் உள்ளிட்ட மேலும் சிலரை போலீஸார் தேடி வருகின்றனர்.