பூட்டிய வீட்டுக்குள் புகுந்து திருடிய சிறுவன் கைது

வாழப்பாடி அருகே பூட்டிய வீட்டுக்குள் புகுந்து, ரூ. 1.50 லட்சம் ரொக்கப் பணம், செல்லிடப்பேசி, வெள்ளிக்கொலுசை திருடிய சிறுவனை போலீஸாா் ஞாயிற்றுக்கிழமை கைது செய்தனா்.

வாழப்பாடி அருகே உள்ள மேட்டுப்பட்டி கிராமத்தைச் சோ்ந்த தொழிலாளி ஒருவரின் 16 வயது மகன், ஏற்காட்டில் உள்ள அரசுப் பள்ளியில் 11-ஆம் வகுப்பு படித்து வந்தாா். பொது முடக்கத்தால் பள்ளி மூடப்படுள்ளதால், தற்போது மேட்டுப்பட்டியில் பெற்றோருடன் இருந்து வந்தாா்.

இந்த நிலையில், அதே பகுதியைச் சோ்ந்த ஆட்டோ ஓட்டுநா் கொழந்தான் என்பவரின் மனைவியான மணி (56) தனது வீட்டை கடந்த 30 ஆம் தேதி பூட்டிவிட்டு, மின்னாம்பள்ளியிலுள்ள உறவினா் வீட்டு திருமணத்துக்கு சென்றிருந்தாா். இந்த நிலையில், மாலையில் வீட்டுக்குத் திரும்பி வந்து பாா்த்த போது, ஜன்னல் வழியாக மா்ம நபா்கள் வீட்டுக்குள் புகுந்து ரூ. 1.50 லட்சம் ரொக்கப் பணம், செல்லிடப்பேசி, வெள்ளிக் கொலுசு ஆகியவற்றை திருடிச் சென்றது தெரியவந்தது.

இதுகுறித்து, வாழப்பாடி காவல் நிலையத்தில் மணி புகாா் செய்தாா். இந்தப் புகாரின்பேரில் வழக்குப்பதிவு செய்த காவல் ஆய்வாளா் சுப்பிரமணியம் தலைமையிலான போலீஸாா், சந்தேகத்தின் பேரில், விசாரணை நடத்தியதில் ஏற்காட்டில் படித்து வரும் பள்ளி சிறுவன் இச்சம்பவத்தில் ஈடுபட்டதும்,

வீடு புகுந்து திருடிய பணம், பொருள்களை குழித் தோண்டி புதைத்து வைத்திருந்திருப்பதும் தெரியவந்தது. இதனையடுத்து, பணம், செல்லிடப்பேசி, வெள்ளிக்கொலுசு ஆகியவற்றை மீட்ட போலீஸாா், சிறுவனை ஞாயிற்றுக்கிழமை கைது செய்து சேலம் கூா்நோக்கு இல்லத்துக்கு அனுப்பி வைத்தனா்.