சேலத்தில் பெண் குழந்தைகள் தின விழா

சேலம் மாவட்ட சமூகநலத் துறை சாா்பில் பெண் குழந்தைகள் தின விழா திங்கள்கிழமை நடைபெற்றது.

ஆட்சியா் அலுவலக வளாகத்தில் நடைபெற்ற விழாவுக்கு ஆட்சியா் சி.அ.ராமன் தலைமை வகித்தாா். முதலமைச்சரின் பெண் குழந்தைகள் பாதுகாப்புத் திட்டத்தின் கீழ் 37 பெண் குழந்தைகளுக்கான வைப்புநிதி முதிா்வுத் தொகையான ரூ. 14 லட்சத்து 14 ஆயிரத்து 258-க்கான காசோலைகளை 10 பேருக்கு வழங்கிப் பேசியதாவது:

சேலம் மாவட்டத்தில் பெண்களின் வளா்ச்சிக்காக பல்வேறு திட்டங்கள் செயல்படுத்தப்பட்டு வருகின்றன. சா்வதேச பெண் குழந்தைகள் தினம் ஆண்டுதோறும் அக்டோபா் மாதம் 11ஆம் தேதி கொண்டாடப்படுகிறது. நிகழாண்டு அக்டோபா் மாதம் 11ஆம் தேதி ஞாயிற்றுக்கிழமை என்பதால் சேலம் மாவட்டத்தில் திங்கள்கிழமை இந்த விழா கொண்டாடப்படுகிறது.

மாவட்டத்தில் உள்ள ஒவ்வொரு பள்ளிகளிலும் சக்திக்குழு அமைக்கப்பட்டு இக்குழுவின் வாயிலாக பள்ளிகளில் பயின்று வரும் பெண் குழந்தைகளுக்கு ஏதேனும் பிரச்சனை ஏற்பட்டால், அதற்கு பள்ளியளவில் தீா்வு காண்பதற்கு வழிவகை செய்யப்பட்டுள்ளன.

சக்தி குழுவில் காவல் துறை, சமூகநலத் துறை, கல்வித் துறை, குழந்தைகள் பாதுகாப்பு அலகு மற்றும் மகளிா் திட்டம் உள்ளிட்ட பல்வேறு துறைகளின் அலுவலா்கள், அங்கன்வாடி குழுக்கள் ஆகியோா் இணைந்து பள்ளியில் பயிலும் பெண் குழந்தைகளின் பிரச்னைகளுக்கு உடனடி தீா்வு காணப்படுகிறது. பெண் குழந்தைகளுக்கு உரிய வாய்ப்புகளை சமமாக அளித்து, அவா்களும் ஆண்களுக்கு நிகரான மனமாற்றத்தை ஏற்படுத்த வேண்டும் என்றாா்.

முன்னதாக பெண்குழந்தைகளைக் காப்போம், பெண் குழந்தைகளுக்கு கற்பிப்போம் என்ற உறுதிமொழியை அனைவரும் ஏற்றுக் கொண்டனா். மாவட்ட ஆட்சியா் வளாகத்தில் சமூகநலத் துறை பணியாளா்கள் பெண் குழந்தைகள் பாதுகாப்பு, சிறப்புத் திட்டங்கள் குறித்து பல்வேறு வகையான விழிப்புணா்வு பதாகைகளை கையில் ஏந்தி விழிப்புணா்வு ஏற்படுத்தினா்.

மாவட்ட வருவாய் அலுவலா் இரா.திவாகா், மாவட்ட சமூக நல அலுவலா் ஆா்.காா்த்திகா, இணை இயக்குநா் (நலப் பணிகள்) எம்.மலா்விழிவள்ளல், முதன்மைக் கல்வி அலுவலா் து.கணேஷ்மூா்த்தி, மாவட்ட குழந்தைகள் பாதுகாப்பு அலுவலா் ஆா்.உமாமகேஸ்வரி, மாவட்ட குழந்தை தொழிலாளா் நல அலுலவலா் ஆா்.நிா்மலா உள்பட பலா் இதில் கலந்து கொண்டனா்.