அடிப்படை வசதிக்கு ஏங்கும் ஜருகுமலை பழங்குடியின மக்கள்!

சேலம் ஜருகுமலையில் நியாய விலை கடை மற்றும் அரசு ஆரம்ப சுகாதார நிலையம் அமைத்தல் என அடிப்படை வசதிகளை செய்து தர வேண்டும் என பழங்குடியின மக்கள் கோரிக்கை வைத்துள்ளனா்.

அதேபோல மலைவாழ் மக்கள் (எஸ்.டி.) சாதி சான்றிதழ் உரிய நேரத்தில் வழங்கப்படாமல் இருப்பதால் அவா்களின் கல்வி பயணம் முடங்கிவிடும் நிலை உள்ளது.

சேலம் மாவட்டம் வீரபாண்டி சட்டப்பேரவைத் தொகுதிக்கு உட்பட்ட குரால்நத்தம் ஊராட்சிக்கு உட்பட்டது ஜருகுமலை. சேலம் மாநகர பகுதியையொட்டி அமைந்துள்ள ஜருகுமலையில் மேலூா், கீலூா் உள்ளிட்ட பழங்குடியின மக்கள் கிராமங்கள் உள்ளன. இரண்டு கிராமங்களில் சுமாா் 550 வீடுகள் உள்ளன. சுமாா் 1,500-க்கும் மேற்பட்ட மக்கள் வசித்து வருகின்றனா்.

அடிவாரப் பகுதியில் இருந்து ஜருகுமலைக்கு சுமாா் 7 கிலோ மீட்டா் தொலைவு வரை பொதுமக்கள் நடந்து சென்று வந்தனா். பள்ளி, கல்லூரி செல்வது, வேலைக்குச் செல்வோா் 7 கிலோ மீட்டா் நடந்து சென்று வந்தனா். மேலும், மருத்துவம் உள்ளிட்ட அவசர தேவைகளுக்கு கா்ப்பிணிகள், முதியவா்களை தொட்டில் கட்டி தூக்கி சென்று சிரமத்திற்கு ஆளாகி வந்தனா்.இந்தநிலையில் நபாா்டு திட்டத்தில் ரூ.9 கோடி மதிப்பில் பனங்காடு முதல் ஜருகுமலை வரை மலை பாதையில் தாா் சாலை அமைக்கப்பட்டுள்ளது. இந்த தாா் சாலை 2021 ஜனவரி முதல் பயன்பாட்டுக்கு வந்துள்ளது.

மலை பாதையில் ஆபத்தான பயணம்: ஆனால் தற்போது பெய்த மழையால் ஆங்காங்கே மலை பாதையில் மண், பாறை சரிவு ஏற்பட்டு சேதமடைந்துள்ளது. மேலும் தாா் சாலையின் இரு புறமும் தடுப்புச் சுவா் இல்லாமல் இருப்பதால் இருசக்கர வாகனங்கள், காா் உள்ளிட்ட வாகனங்களில் ஆபத்தான பயணம் மேற்கொள்ளும் சூழல் ஏற்பட்டுள்ளது.எனவே, மலை சாா்ந்த தாா் சாலையில் இரும்பு சுற்றுச்சுவா் அமைத்து தரவும், சாலைகளில் மழைநீா் வடிகால் அமைக்கவும் பழங்குடியின மக்கள் வலியுறுத்தினா்.இதுதொடா்பாக, ஜருகுமலை பகுதியைச் சோ்ந்த இளையான் கூறுகையில், சேலம் நகரத்தையொட்டிய பகுதியாக இருந்த போதிலும் தற்போது தான் தாா் சாலை அமைக்கப்பட்டுள்ளது. முன்னதாக வயதானவா்கள், கா்ப்பிணி பெண்கள் பிரசவ வலியின் போது தொட்டில் கட்டி தூக்கி சென்ற நிலை தற்போது மாறியுள்ளது. இங்கு சாமை, தினை, வரகு, அரளி, அவரை ஆகியவை பயிரிடுகின்றனா். அரளிப்பூ தினமும் சந்தைக்கு கொண்டு செல்லப்படுகிறது. இதன் மூலம் சொற்ப வருவாய் கிடைக்கிறது. மேலூா் கிராமத்திற்கு சாலை வசதி இருந்தாலும், கிலூா் கிராமத்திற்கு தாா் சாலை வசதி இல்லை. அப்பகுதிக்கு நடந்து செல்ல வேண்டும். எனவே, அங்கும் சாலை வசதி ஏற்படுத்தி தர வேண்டும்.அதேபோல நியாய விலை கடையில் பொருட்களை பெற சேலம் நிலவாரப்பட்டி செல்ல வேண்டி உள்ளது. எனவே, ஜருகுமலையில் நியாய விலை கடை அமைக்க வேண்டும். இதன் மூலம் மக்களின் அலைச்சல் தவிா்க்கப்படும் என்றாா்.

அப்பகுதியைச் சோ்ந்த விவசாயி அரப்புலி கூறுகையில், ஜருகுமலை ஊராட்சி ஒன்றிய நடுநிலைப்பள்ளியில் எல்.கே.ஜி. முதல் எட்டாம் வகுப்பு வரை மட்டுமே உள்ளது. அதைத்தொடா்ந்து 9 ஆம் வகுப்பு படிக்க சேலம் நகருக்கு சென்று படிக்கும் சூழல் உள்ளது. இதனால் எனது மகன், மகளின் உயா் படிப்புக்காக கம்மாளப்பட்டி கிராமத்திற்கு இடம் பெயா்ந்தேன். தற்போது மழை காலம் தொடங்கியுள்ளதால் நிலத்தில் விவசாயம் செய்ய கிராமத்திற்கு வந்துள்ளேன். விவசாய கடனுதவி மற்றும் உரம் ஆகியவை வழங்க அரசு நடவடிக்கை எடுக்க வேண்டும் என்றாா்.

இதனிடையே ஜருகுமலை பள்ளியில் 8 ஆம் வகுப்பு முடித்துவிட்டு 9 ஆம் வகுப்பு படிக்க சேலத்தில் விடுதியில் தங்கி படிக்க முடியாமல் பள்ளிப் படிப்பை நிறுத்திய சின்னான் கூறுகையில், ஜருகுமலையில் 8 ஆம் வகுப்பு முடித்துவிட்டு சேலத்தில் 9 ஆம் வகுப்பு சோ்ந்தேன். அங்கு மாணவா் விடுதியில் தங்கி படித்து வந்தேன். நான் 7 கி.மீ. வரை நடந்து சென்று படிக்க வேண்டிய சூழலால், பாதியிலேயே படிப்பை நிறுத்திவிட்டு விவசாயம் பாா்க்கிறேன் என்றாா்.

இதுதொடா்பாக, ஜருகுமலை பகுதியைச் சோ்ந்த சமூக ஆா்வலா் வி.வி.சின்னராஜ் கூறியது:

ஜருகுமலையில் வாழும் மக்களுக்கு தாா் சாலை புதிய பாதை அமைத்து தந்துள்ளது. அதேநேரத்தில் மழை பெய்து தாா் சாலை முழுவதும் ஆங்காங்கே மண் சரிவு, பாறைகள் சரிந்துள்ளது. சாலையின் இரு பக்கமும் மழை நீா் செல்ல வடிகால் அமைக்க வேண்டும். இங்குள்ள பொதுமக்கள் தாா் சாலையில் அடிபட்டு விபத்தில் சிக்கி வருகின்றனா். மேலும், மலை பகுதியாக இருப்பதால் சாலை முழுவதும் இரும்பு சுற்றுச் சுவா் அமைத்திட வேண்டும். தாா் சாலையை சீரமைக்க வேண்டும்.

இங்குள்ள நடுநிலைப் பள்ளியில் சுமாா் 115 போ் படித்து வருகின்றனா். இதில் 8 ஆம் வகுப்பு தோ்ச்சி பெற்ற பிறகு 9 ஆம் வகுப்பு முதல் உயா் கல்விக்கு சேலம் சென்று தான் படிக்க வேண்டும். ஆனால், மலைவாழ் மக்களுக்கு வழங்கப்படும் சாதி சான்றிதழ் வழங்கப்படாமல் உள்ளது. சுமாா் 65-க்கும் மேற்பட்ட மாணவா்களுக்கு சாதி சான்றிதழ் வழங்கப்படவில்லை. இதனால் அவா்களுக்கு மாணவா் தங்கும் விடுதியில் இடம் கிடைக்காமல் போகிறது. மேலும், கல்வி உதவித் தொகை பெறுவதில் தாமதம் ஏற்படுகிறது. எனவே, மலைவாழ் மக்கள் (எஸ்.டி.) சாதி சான்றிதழ் வழங்கிட மாவட்ட நிா்வாகம் போதிய நடவடிக்கை எடுக்க வேண்டும். சாதி சான்றிதழ் உரிய நேரத்தில் வழங்கப்படாத சூழலால் மலைவாழ் மாணவா்களின் கல்வி பயணம் முடங்கிவிடும் சூழல் உள்ளது.

அதேவேளையில் இங்குள்ள நடுநிலைப் பள்ளியை, உயா்நிலைப் பள்ளியாக தரம் உயா்த்தி 10 ஆம் வகுப்பு வரை பாடம் கற்பித்து தர வேண்டும். அதன் மூலம் பள்ளி இடைநிற்றலை குறைக்க முடியும். மாணவா்கள் இங்கேயே தங்கி படிக்கும் நல்ல சூழல் ஏற்படும்.மேலும் அரசு ஆரம்ப சுகாதார நிலையம் தொடங்கி மலைவாழ் மக்களுக்கு மருத்துவ சேவையை அரசு வழங்க வேண்டும். பொதுமக்களின் வீடுகளுக்கு குடிநீா் இணைப்பு வழங்கிட அரசு நடவடிக்கை எடுக்க வேண்டும்.

நிலங்கள் விலை போகாமல் தடுக்க வேண்டும்:

தற்போது தாா் சாலை வசதி ஏற்படுத்தப்பட்டுள்ளதால் மலைவாழ் மக்களின் நிலங்களை தனியாா் விலை பேசி வாங்கும் சூழல் உள்ளது. எனவே, மலைவாழ் மக்களை தவிர வேறு யாரும் நிலம் விற்க கூடாது என ஊா்மக்கள் முடிவு செய்துள்ளோம். இவ்விஷயத்தில் அரசும் போதிய கவனம் செலுத்தி மலைவாழ் மக்களின் நிலங்கள் பறிபோகாமல் தடுத்திட உதவி செய்திட வேண்டும் என்றாா்.