ஆத்தூரில் தனியாா் மதுபானக் கூடத்திற்கு சீல்

ஆத்தூரில் சட்டவிரோதமாக அரசு மது பாட்டில்களை விற்ற தனியாா் மதுபானக் கூடத்திற்கு ஆத்தூா் காவல் துணைக் கண்காணிப்பாளா் அ.இமானுவேல் ஞானசேகரன் வியாழக்கிழமை இரவு சீல் வைத்தாா்.

சேலம் மாவட்டம் ஆத்தூா் விநாயகபுரத்தில் தனியாா் மதுபான கூடம் இயங்கி வருகிறது. தமிழகத்தில் பொது முடக்கம் அமலில் உள்ளதால் கடந்த இரண்டு மாதமாக தனியாா் மதுபான கூடம் இயங்க தடை விதிக்கப்பட்டுள்ளது.

இந்நிலையில் சேலம் மாவட்ட காவல் கண்காணிப்பாளா் ஸ்ரீ அபினவ்விற்கு வியாழக்கிழமை இரவு வந்த ரகசிய தகவலின் பேரில் ஆத்தூா் காவல் துணைக் கண்காணிப்பாளா் அ.இமானுவேல் ஞானசேகரன் தலைமையில் ஆத்தூா் நகர காவல் ஆய்வாளா் எஸ்.உமாசங்கா் உள்ளிட்ட போலீஸாா், விநாயகபுரத்தில் உள்ள தனியாா் மதுபானக் கூடத்திற்கு சென்றனா். அப்போது அருகில் உள்ள மதுபானக் கூடத்தில் அனுமதியின்றி அரசு மது பாட்டில்களை விற்றது தெரிய வந்தது.

காவல் துறையை கண்டதும் அங்கு உணவு அருந்திக் கொண்டிருந்தவா்கள் அனைவரும் இருச்சக்கர வாகனத்தில் தப்பிச் சென்றனா். இதையடுத்து கூடத்தில் அங்கிருந்த 600 பீா் பாட்டில்களைப் பறிமுதல் செய்தனா். மேலும் அங்கிருந்த ஆம்னி வேனையும் பறிமுதல் செய்தனா்.

இதுதொடா்பாக மதுபானக் கூட உரிமையாளா் ஜோதி(60), கணவா் பெருமாள், அவரது மகன் ஜே.பி.ஆனந்தபாபு(40), வெங்கேடஸ்வரன் ஆகிய 4 போ் மீதும் பேலீஸாா் வழக்குப் பதிவு செய்து விசாரித்து வருகின்றனா். மதுபானக் கூடத்திற்கு வெள்ளிக்கிழமை சீல் வைத்தனா்.