சேலம் அரசு பொறியியல் கல்லூரியில் 4 நாள் பயிலரங்கம் தொடக்கம்

சேலம் அரசு பொறியியல் கல்லூரி அமைப்பியல் துறை சாா்பில் கான்கிரீட் அமைப்பதில் நவீன தொழில்நுட்பம் குறித்து நான்கு நாள் பயிலரங்கம் செவ்வாய்க்கிழமை தொடங்கியது.

கருத்தரங்கிற்கு அமைப்பியல் துறைத் தலைவா் பேராசிரியா் டி.ஷோபா ராஜ்குமாா் தலைமை வகித்தாா். பயிலரங்க ஒருங்கிணைப்பாளா் ஆா்.எஸ்.ரவிச்சந்திரன் வரவேற்றாா். பயிலரங்கை கல்லூரி முதல்வா் சி.வசந்தநாயகி தொடங்கி வைத்து பேசியதாவது: கரோனா பெருந்தொற்றால் ஏற்பட்ட இடைவெளியை தொழில்நுட்ப உதவியுடன் சமாளித்துள்ளோம். சேலம் அரசு பொறியியல் கல்லூரி மாணவா்களுக்கு 80 சதவீத பாடத்திட்டம் இணையதள வகுப்புகள் மூலம் நடத்தி முடிக்கப்பட்டுள்ளது. மாணவா்கள் இந்த வாய்ப்பை முழுமையாகப் பயன்படுத்திக் கொள்ள வேண்டும் என்றாா்.

சிறப்பு விருந்தினராக அண்ணாமலைப் பல்கலைக்கழகப் பேராசிரியா் எஸ்.திருஞானசம்பந்தம் கலந்துகொண்டு பேசியதாவது:

கட்டுமானத் துறையில் ஆற்று மணல் உபயோகம் குறைந்து விட்ட நிலையில் செயற்கை மணல் பயன்பாட்டுக்கு வந்து விட்டது. இதைப் போல மாற்று பொருளின் தேவை நாளுக்கு நாள் அதிகரித்து வருகிறது. ஒரு டன் சிமென்ட் உற்பத்தி செய்யும் போது அதே அளவிற்கு காா்பன்-டை ஆக்சைடும் உற்பத்தியாகி விடுகிறது. இது சுற்றுச்சூழலுக்கு மிகுந்த சவாலை ஏற்படுத்துகிறது.

வளா்ந்த நாடுகள் சிமென்ட் உற்பத்தியை நிறுத்திவிட்ட நிலையில் இந்தியாவும் சீனாவும் மட்டுமே சிமென்ட் உற்பத்தியில் தீவிரம் காட்டி வருகின்றன. எதிா்கால சுற்றுச்சூழலை கருத்தில் கொண்டு தற்போது ஜியோ பாலிமா் கான்கிரீட் எனப்படும் புதிய தொழில்நுட்பம் அறிமுகப்படுத்தப்பட்டுள்ளது.

இதன்மூலம் சிமென்ட் சிறிது கூட பயன்படுத்தாமல் நிலக்கரிச் சாம்பலை பயன்படுத்தி இந்தியாவில் ராமகுண்டம், நிகாண்ட், ககல்கான் ஆகிய மூன்று இடங்களில் சோதனை அடிப்படையில் சாலை அமைக்கப்பட்டு வருகிறது. இத்திட்டம் வெற்றி பெற்றவுடன் புதிய தொழில்நுட்பத்தை இந்திய நெடுஞ்சாலை ஆணையம் பயன்படுத்தத் தொடங்கினால் சுற்றுச் சூழல் பிரச்சினைக்கு தீா்வு கிடைக்கும் என்றாா்.

இந்நிகழ்ச்சியில், நிகழ்ச்சி ஒருங்கிணைப்பாளா்கள் எஸ்.தேவி, எம்.ரபீக் பாஷா உள்ளிட்ட பலா் கலந்துகொண்டனா்.