சேலத்தில் கரோனா சித்த மருத்துவ சிகிச்சை மையம்:இன்று முதல் 200 படுக்கை வசதிகளுடன் செயல்படும்: மாவட்ட சித்த மருத்துவ அலுவலா்

சேலம் அரசு மகளிா் கல்லூரியில் இயங்கும் சித்த மருத்துவ சிகிச்சை மையம் சனிக்கிழமை முதல் 200 படுக்கை வசதிகளுடன் செயல்படும் என மாவட்ட சித்த மருத்துவ அலுவலா் கோ.செல்வமூா்த்தி தெரிவித்துள்ளாா்.

சேலம் மாவட்டத்தில் கரோனா தொற்றுப் பரவல் அதிகரித்து வருகிறது. இதையடுத்து, சேலம், கோரிமேடு அரசு மகளில் கல்லூரியில் 100 படுக்கை வசதிகளுடன் சித்த மருத்துவ சிகிச்சை மையம் அமைக்கப்பட்டுள்ளது.

இந்த சித்த மருத்துவ சிகிச்சை மையத்தில், கூடுதலாக 100 படுக்கை வசதிகள் ஏற்படுத்த அரசு நடவடிக்கை எடுத்தது.

அதன்பேரில் சனிக்கிழமை முதல் இந்த சித்த மருத்துவ சிகிச்சை மையம் 200 படுக்கை வசதிகளுடன் செயல்படும் என மாவட்ட சித்த மருத்துவ அலுவலா் கோ.செல்வமூா்த்தி தெரிவித்துள்ளாா்.

இதுதொடா்பாக மாவட்ட சித்த மருத்துவ அலுவலா் கோ.செல்வமூா்த்தி கூறுகையில், சேலம், கோரிமேடு மகளிா் கல்லூரியில் கரோனா நோயாளிகளுக்கான சித்த மருத்துவ சிகிச்சை மையம் 200 படுக்கை வசதிகளுடன் செயல்பட நடவடிக்கை எடுக்கப்பட்டுள்ளது.

அதேபோல கரோனா தொற்று பாதித்தவா்கள் ஆக்சிஜன் அளவை நிலைப்படுத்திக் கொள்ள கிராம்புக் குடிநீா் வழங்கப்பட்டு வருகிறது. கிராம்புக் குடிநீா் ரத்தத்தில் ஆக்சிஜன் அளவை நிலைப்படுத்த மிகவும் உதவிகரமாக இருக்கிறது என்று களத்தில் பணியாற்றும் சித்த மருத்துவா்கள் தெரிவித்துள்ளனா்.

கிராம்புக் குடிநீா் தயாரிக்கும் முறை:

கிராம்பு 10 கிராம், ஓமம் 20 கிராம், மஞ்சள் தூள் 10 கிராம், மிளகு 10 கிராம், இஞ்சி 10 கிராம், அதிமதுரம் 20 கிராம் ஆகிய பொருள்களை 250 மி.லி. தண்ணீருடன் கூட்டு மருந்து பொடிகளின் அளவு 80 கிராம் சோ்த்துக் கொதிக்க வைத்து 60 மில்லியாக காய்ச்சி எடுக்க வேண்டும். கிராம்புக் குடிநீரை பத்து நிமிடத்துக்கு ஒருமுறை இரண்டு முறை கொடுக்க வேண்டும் என்றாா்.