சேலத்தில் ரூ.100 கோடி மதிப்பீட்டில் பேருந்து நிலையம்: அமைச்சர் கே.என்.நேரு ஆய்வு

சேலம்: சேலம் பழைய பேருந்து நிலையத்தில் சுமார் ரூ.100 கோடி மதிப்பீட்டில் கட்டப்பட்டுவரும் பேருந்து நிலைய கட்டுமான பணிகளை நகராட்சி நிர்வாகத் துறை அமைச்சர் கே.என்.நேரு நேரில் பார்வையிட்டு ஆய்வு செய்தார்.

சேலம் மாநகராட்சி ஸ்மார்ட் சிட்டி திட்டத்தின் கீழ் சுமார் 1,000 கோடி ரூபாய் மதிப்பீட்டில் பல்வேறு திட்ட பணிகள் செயல்படுத்தப்பட்டு வருகிறது. இதன் பணிகள் பழைய பேருந்து நிலையம் பகுதிகளில் இருந்த பழைய கட்டிடங்களை அகற்றிவிட்டு சுமார் 100 கோடி ரூபாய் மதிப்பீட்டில் அதிநவீன இரண்டடுக்கு பேருந்து நிலையம் அமைக்கும் பணி கடந்த இரண்டு ஆண்டுகளாக நடைபெற்று வருகிறது.

இந்த பணிகள் அனைத்தும் தற்போது முடிவுரும் நிலையில் உள்ளது. இந்த நிலையில் பேருந்து நிலைய கட்டுமானப் பணிகளை நகராட்சி நிர்வாகத் துறை அமைச்சர் கே.என்.நேரு அதிகாரிகளுடன் நேரில் பார்வையிட்டு ஆய்வு செய்தார். அப்போது கட்டிட பணிகள் குறிப்பிட்ட காலத்திற்குள் முடிக்கப்பட வேண்டும். நிலுவையில் உள்ள பணிகள் குறித்து விரிவாக கேட்டறிந்தார்.

இதைத் தொடர்ந்து பழைய பேருந்து நிலையத்தை இணைக்கும் பாலப் பணிகள் மற்றும் சாலை பணிகள் தற்போது வேகமாக நடைபெற்று வருவதால், அதனையும் போர்க்கால அடிப்படையில் உடனடியாக நிறைவேற்றிட அதிகாரிக்கு உத்தரவிட்டதோடு விரைவில் மக்கள் பயன்பாட்டுக்கு பேருந்து நிலையத்தை கொண்டுவர நடவடிக்கை எடுக்க வேண்டும் என்றும் உத்தரவிட்டார்.

மேலும் பேருந்து நிலைய வளாகத்தில் அமைக்கப்பட்டுள்ள கடைகளுக்கான வசதிகள்,  பயணிகளுக்கு தேவையான அடிப்படைத் தேவைகள் குறித்தும் அமைச்சர் ஆய்வு மேற்கொண்டு அதிகாரிகளிடம் கேட்டறிந்தார். 

இந்த நிகழ்ச்சியில் சேலம் வடக்கு சட்டமன்ற உறுப்பினர் ராஜேந்திரன், மாநகர ஆணையாளர் செல்வராஜ், மாநகராட்சி மேயர் ராமச்சந்திரன், துணை மேயர் சாரதாதேவி மாணிக்கம் உள்ளிட்ட பலர் கலந்து கொண்டனர்.