வாழப்பாடியில் தேவாலய வணிக கட்டடத்தில் இயேசு சிலை:  பாஜக எதிர்ப்பால் திரையிட்டு மறைப்பு

வாழப்பாடி பத்தாம் பத்திநாதர் தேவாலய வணிக கட்டத்தின் மீது சனிக்கிழமை நிறுவப்பட்ட 8 உயர இயேசுவின் திருவுருவச்சிலை, பாஜக., எதிர்ப்பால் திரையிட்டு மூடி மறைக்கப்பட்டது. 

சேலம் மாவட்டம், வாழப்பாடி பேருந்து நிலையம் அருகே கடலுார் பிரதான சாலையில், கத்தோலிக்க கிறித்துவர்களின் பத்தாம்பத்திநாதர் மற்றும் புனித அந்தோனியார் தேவாலயம் அமைந்துள்ளது. இந்த தேவாலய வளாகத்திலுள்ள மூன்றடுக்கு வணிக கட்டத்தை புதுப்பிக்கும் பணிகள் நடைபெற்று வருகிறது.

இதற்கிடையே, தரையில் இருந்து மூன்றாவது மாடியில் மேல் 8 அடி உயர இயேசுவின் முழு உருவ பைபர் சிலை சனிக்கிழமை நிறுவப்பட்டது.

இதையும் படிக்க- ஈரோடு ரயில் நிலையத்தில் ஓடும் ரயிலில் இருந்து தவறி விழந்த இளைஞரை காப்பாற்றிய போலீசார்

இச்சிலை அனுமதியின்றி வைக்கப்பட்டுள்ளதாகக் கூறி, அகற்ற வேண்டுமென கோரிக்கை விடுத்து, சேலம் கிழக்கு மாவட்ட பாஜக தலைவர் வழக்குரைஞர் க.மணிகண்டன் தலைமையில், நிர்வாகிகள், பொன்.பழனிசாமி, குணசேகரன், வெங்கடாஜலம், ஜேகே, பழனிவேல்,ஹரிஜெயசித்ரா உள்ளிட்டோர் தேவாலயத்திற்கு முன் கூடியதால் பரபரப்பு ஏற்பட்டது. 

இதுகுறித்து தகவலறிந்த வாழப்பாடி காவல் ஆய்வாளர் உமாசங்கர், வருவாய் ஆய்வாளர் கார்த்திக், கிராம நிர்வாக அலுவலர் சக்திவேல் உள்ளிட்ட அதிகாரிகள், தேவாலய நிர்வாகிகள் மற்றும் பாஜக–வினருடன் அமைதிப் பேச்சுவார்த்தை நடத்தினர். இதனையடுத்து, தேவாலய வணிக கட்டத்தின் மேல் நிறுவப்பட்ட இயேசுவின் திருவுருவச்சிலை, திரைச்சேலைக் கொண்டு மூடி மறைக்கப்பட்டது. 

முறையான அனுமதி பெற்ற பிறகு தேவாலய நிர்வாகம் சிலையை திறக்க முடிவு செய்யப்பட்டது.  பிரச்னைக்கு சுமூகத்தீர்வு ஏற்பட்டதால் இரு தரப்பினரும் கலைந்து சென்றனர்.

இதுகுறித்து கத்தோலிக்க கிறித்துவ பங்கு மக்கள் கூறுகையில், தேவாலயத்திற்கு சொந்தமான  வணிக கட்டடத்தில், ஏற்கனவே இயேசுவின் சிமெண்ட் சிலை வைக்கப்பட்டிருந்தது. இச்சிலை அப்புறப்படுத்தப்பட்டதால், அதற்கு மாற்றாக தற்போது புதிய பைபர் சிலை நிறுவப்பட்டுள்ளது. என்றனர்.