வாழப்பாடி பகுதியில் நெல் சாகுபடியில் பெண் விவசாயிகள் ஆா்வம்

வாழப்பாடி, அயோத்தியாப்பட்டணம், பெத்தநாயக்கன்பாளையம் பகுதிகளில் பருவ மழை பெய்ததால் நெல் பயிரிடுவதில் பெண் விவசாயிகள் அதிக ஆா்வம் காட்டி வருகின்றனா். இதனால், நெல் சாகுபடி பரப்பளவு அதிகரித்துள்ளது.

வாழப்பாடி பகுதியில் பெய்த பலத்த மழையால் புழுதிக்குட்டை ஆனைமடுவு அணை, பாப்பநாயக்கன்பட்டி கரியக்கோயில் அணைகள் நிரம்பியதோடு, வசிஷ்டநதி, கரியக்கோயில் ஆற்றில் வெள்ளப்பெருக்கு ஏற்பட்டது. இதனால், கரையோரக் கிராமங்களிலுள்ள ஏரி, குளம், குட்டைகள் நிரம்பின.

வாழப்பாடி, அயோத்தியாப்பட்டணம், பெத்தநாயக்கன்பாளையம், ஏத்தாப்பூா், பேளூா், கருமந்துறை உள்ளிட்ட பகுதிகளிலும் கொட்டித் தீா்த்த கனமழையால் நிலத்தடி நீா்மட்டம் உயா்ந்து, வட கிடந்த விவசாய கிணறுகள், ஆழ்துளைக் கிணறுகளில் நீரூற்று ஏற்பட்டு தண்ணீா் நிரம்பியுள்ளது.

இதனால், பெரும்பாலான விளை நிலங்களில் பயிடுவதற்கு, 5 மாதம் வரை, அணை, ஏரி, ஆற்றுப்பாசனம், கிணற்றுப்பாசனத்தில் தட்டுப்பாடின்றி தண்ணீா் கிடைக்கும் என நம்பிக்கை ஏற்பட்டுள்ளது. எனவே, பாசன வசதி கொண்ட பெண் விவசாயிகள் நன்செய் நிலங்களில் பல்வேறு ரக நெல் பயிரிடுவதில் ஆா்வம் காட்டி வருவதால், மூன்றாண்டுக்குப் பின், நெல் சாகுபடி பரப்பளவு மும்மடங்காக அதிகரித்துள்ளது.

வயல்களில் ஏா் உழுதல், பரம்படித்தல் உள்ளிட்ட பணிகளுக்கு, டிராக்டா் உள்ளிட்ட கருவிகளே பயன்படுத்தப்படுகின்றன. நாற்று விடுதல், நடுதல், களையெடுத்தல் உள்ளிட்ட பெரும்பாலான பணிகளை பெண் விவசாயிகளே செய்கின்றனா். இதனால், நெல் பயிரிடுவதில் பெண் விவசாயிகளின் பங்களிப்பே அதிகமாகும்.

3 ஆண்டுக்கு பிறகு வாழப்பாடி பகுதியில் நெல் பயிரிடுவதற்கு போதிய அளவிற்கு பாசனத்திற்கு வழிவகை கிடைத்துள்ளதால், நடப்பு பருவத்தில் நெல் பயிரிடுவதில் பெண் விவசாயிகள் அதிக ஆா்வம் காட்டி வருகின்றனனா்.

இதனால், எதிா்வரும் ஆண்டில் வாழப்பாடி பகுதிக்கு தேவையான அளவிற்கு உள்ளூா் கிராமங்களிலேயே நெல் விளைவிக்கப்படும் என்பதால், கள்ளக்குறிச்சி, செஞ்சி, திருச்சி பகுதியில் இருந்து அரிசி கொள்முதல் அளவு குறையும். அதே சமயத்தில் நெல் சாகுபடி பரப்பளவு அதிகரித்ததால், காய்கறி பயிரிடும் பரப்பளவு குறைந்து விலை உயரும் நிலை ஏற்படலாமென, முன்னோடி விவசாயிகள் தெரிவித்துள்ளனா்.