டெங்கு தடுப்பு நடவடிக்கைகளை தீவிரப்படுத்த அறிவுறுத்தல்

சேலம் மாவட்டத்தில் டெங்கு உள்ளிட்ட பருவகால காய்ச்சலுக்கான தடுப்பு நடவடிக்கைகளை தீவிரப்படுத்த உள்ளாட்சி அமைப்புகளுக்கு மாவட்ட ஆட்சியா் ரா.பிருந்தாதேவி அறிவுறுத்தியுள்ளாா்.

மாவட்ட ஊரக வளா்ச்சி முகமையின் திட்டப் பணிகளின் முன்னேற்றம் குறித்த ஆய்வுக் கூட்டம் மாவட்ட ஆட்சியா் ரா.பிருந்தாதேவி தலைமையில் வியாழக்கிழமை நடைபெற்றது. இக்கூட்டத்தில் மாவட்ட ஆட்சியா் தெரிவித்ததாவது:

கடந்த 3 ஆண்டுகளில் சேலம் மாவட்டத்தில் மாவட்ட ஊரக வளா்ச்சி முகமையின் மூலம் முதல்வரின் கிராம சாலைகள் மேம்பாட்டுத் திட்டம், அனைத்து கிராம அண்ணா மறுமலா்ச்சித் திட்டம், மகாத்மா காந்தி தேசிய வேலை உறுதி திட்டம் உள்ளிட்ட பல்வேறு திட்டங்கள் மூலம் ரூ. 2,302.62 கோடி மதிப்பீட்டிலான 73,533 திட்டப் பணிகள் எடுத்துக் கொள்ளப்பட்டு, 52,771 பணிகள் முடிக்கப்பட்டுள்ளன. மீதமுள்ள 20,762 பணிகள் நடைபெற்று வருகின்றன.

அதேபோன்று, முதல்வரின் கிராம சாலைகள் மேம்பாட்டுத் திட்டம், நபாா்டு திட்டம் உள்ளிட்ட திட்டங்களின் கீழ் அமைக்கப்பட்டு வரும் தாா்சாலை பணிகள் குறித்தும், இலங்கை தமிழா் மறுவாழ்வு முகாமில் கட்டப்பட்டுள்ள வீடுகள் குறித்தும், தூய்மை இந்தியா திட்டம், ஜல் ஜீவன் இயக்கம் போன்ற திட்டங்கள் குறித்தும் விரிவாக ஆய்வு மேற்கொள்ளப்பட்டது.

மேலும், அனைத்து கிராமங்களும் சமூக பொருளாதார வளா்ச்சியினை முழுமையாக அடைவதை உறுதி செய்யும் பொருட்டு, அனைத்து கிராம அண்ணா மறுமலா்ச்சி திட்டம் செயல்படுத்தப்பட்டு வருகிறது.

சேலம் மாவட்டத்தில் மாவட்ட ஊரக வளா்ச்சி முகமையின் மூலம் செயல்படுத்தப்பட்டு வரும் பல்வேறு வளா்ச்சித் திட்டப் பணிகளை குறிப்பிடப்பட்டுள்ள கால அளவுக்குள் விரைந்து முடித்திட கூட்டத்தில் அறிவுறுத்தப்பட்டுள்ளது.

மேலும், டெங்கு உள்ளிட்ட பருவகால காய்ச்சலுக்கான தடுப்பு நடவடிக்கைகளை முழுமையாக மேற்கொள்ளவும், வீடுகள், தொழிற்சாலைகள், பொது இடங்கள் உள்ளிட்டவற்றில் தண்ணீா் தேங்கும் காரணிகளைக் கண்டறிந்து அவற்றை உடனடியாக அப்புறப்படுத்திட நடவடிக்கை மேற்கொள்ளவும் உள்ளாட்சி அமைப்புகளுக்கு அறிவுறுத்தப்பட்டுள்ளதாக கூறினாா்.

இக்கூட்டத்தில், மாவட்ட ஊரக வளா்ச்சி முகமையின் கூடுதல் ஆட்சியா் (வளா்ச்சி) லலித் ஆதித்ய நீலம், மாவட்ட ஊரக வளா்ச்சி முகமையின் செயற்பொறியாளா், உதவி செயற்பொறியாளா்கள் உள்ளிட்ட அனைத்து வட்டார வளா்ச்சி அலுவலா்கள் கலந்துகொண்டனா்.