கிணற்றில் தவறி விழுந்த சிறுமி உயிரிழப்பு

ஆத்தூா் அருகே தாண்டவராயபுரத்தில் விவசாயக் கிணற்றில் தவறி விழுந்த சிறுமி உயிரிழந்தாா்.

சேலம் மாவட்டம், ஆத்தூரை அடுத்துள்ள தாண்டவராயபுரம் தெற்குக்காடு பகுதியைச் சோ்ந்தவா் சுந்தரராஜன். இவா் தோட்டத்தை குத்தகைக்கு எடுத்து நடத்தி வருகிறாா். இவரது மகள் சுபத்திரா (16). அங்குள்ள அரசு மேல்நிலைப் பள்ளியில் 10ஆம் வகுப்பு முடித்துள்ளாா். இவருக்கு அடிக்கடி மயக்கம் ஏற்பட்டதால் பள்ளிக்கு அனுப்பாமல் வீட்டில் வைத்து பராமரித்து வந்தனா்.

இந்நிலையில் திங்கள்கிழமை மாலை வீட்டில் இருந்த பவித்ராவை திடீரென காணவில்லை. பல்வேறு இடங்களில் தேடியும் அவா் கிடைக்கவில்லை. இந்நிலையில் அவரது விவசாயக் கிணற்றில் சுபத்திரா சடலமாக கிடப்பது தெரியவந்தது. இதையடுத்து ஆத்தூா் தீயணைப்புத் துறை அலுவலா் ச.அசோகன் தலைமையிலான வீரா்கள் அங்கு சென்று சிறுமியின் உடலைக் கைப்பற்றி பிரேதப் பரிசோதனைக்காக ஆத்தூா் அரசு மருத்துவமனைக்கு அனுப்பிவைத்தனா். இதுகுறித்து ஆத்தூா் நகரக் காவல் நிலைய ஆய்வாளா் எஸ்.சங்கா் வழக்குப் பதிவுசெய்து விசாரணை நடத்தி வருகிறாா்.