அரசு அலுவலரின் கோரிக்கையை பரிசீலிக்காமல் காலம் தாழ்த்துவது கடமை மீறல்: உயா்நீதிமன்றம்

மதுரை: அரசு அலுவலரின் கோரிக்கை மனுவை பரிசீலிக்காமல், சம்பந்தப்பட்ட அலுவலா் நீண்ட நாள்கள் காலம் தாழ்த்துவது கடமை மீறல் என சென்னை உயா்நீதிமன்ற மதுரைக் கிளை திங்கள்கிழமை தெரிவித்தது.

தென்காசி மாவட்டத்தைச் சோ்ந்த முப்பிடாதி தாக்கல் செய்த மனு:

நான் கடந்த 2009-இல் தட்டச்சராக அரசுப் பணியில் சோ்ந்தேன். எனக்கு ஊதிய நிா்ணயம் முறையாக நடைபெறவில்லை. கடந்த 2010 -ஆம் ஆண்டு அரசாணைப் படி,

எனக்கு உரிய சலுகைகள் வழங்கப்படவில்லை. இது குறித்து சம்பந்தப்பட்ட அரசு அதிகாரிகளுக்கு மனு அளித்தேன். எனது கோரிக்கை நிராகரிக்கப்பட்டது. இதையடுத்து, சென்னை உயா்நீதிமன்ற மதுரைக் கிளையில் வழக்குத் தொடுத்தேன். எனது கோரிக்கையை அரசு அதிகாரிகள் நிராகரித்ததை ரத்து செய்து உயா்நீதிமன்றம் உத்தரவிட்டது. இதற்கு எதிராக அரசுத் தரப்பில் தாக்கல் செய்யப்பட்ட மேல்முறையீட்டு மனுக்கள் ரத்து செய்யப்பட்டன.

இதையடுத்து, எனது ஊதிய நிா்ணயம் தொடா்பான நீதிமன்ற உத்தரவை அமல்படுத்தக் கோரி, மாவட்ட கருவூல அலுவலருக்கு மனு அளித்தேன். எந்த நடவடிக்கையும் இல்லை. எனவே, எனது ஊதிய நிா்ணயத்தை மாற்றியமைக்க கருவூல அதிகாரிக்கு உத்தரவிட வேண்டும் என மனுவில் கோரியிருந்தாா்.

இந்த வழக்கை விசாரித்த உயா்நீதிமன்ற நீதிபதி மஞ்சுளா பிறப்பித்த உத்தரவு:

அரசு அலுவலரின் கோரிக்கை மனுவை பரிசீலிக்காமல், சம்பந்தப்பட்ட அலுவலா்

நீண்ட நாள்கள் காலம் தாழ்த்துவது கடமை மீறலாகும். அரசு அதிகாரிகளின் தவறு காரணமாக மனுதாரா் நீதிமன்றத்தை நாடியுள்ளாா். மனுதாரரின் கோரிக்கையை மாவட்டக் கருவூல அலுவலா்கள் தகுதியின் அடிப்படையில் 4 வாரங்களில் பரிசீலித்து, உரிய முடிவெடுக்க வேண்டும் என்றாா் நீதிபதி.