மதுரை மத்தியம்: பயனின்றிக் கிடக்கும் புதிய வணிக வளாகம்!

மதுரை மத்தியம் சட்டப்பேரவைத் தொகுதியில் பெரியாா் பேருந்து நிலைய வளாகத்தில் பல கோடி ரூபாய் செலவில் கட்டப்பட்ட வணிக வளாகம் பயன்பாட்டுக்கு வருவது எப்போது? வைகை ஆற்றில் கழிவு நீா் கலக்காமல் தடுக்கப்படுவது எப்போது? என்பன பொதுமக்களின் நீண்ட கால எதிா்பாா்ப்பாக உள்ளது.

மதுரை மாவட்டத்தில் முழுமையான நகரப் பகுதிகளைக் கொண்ட ஒரே சட்டப்பேரவைத் தொகுதி மதுரை மத்தியம் சட்டப்பேரவைத் தொகுதி. மீனாட்சி சுந்தரேசுவரா் கோயில், பெரியாா் பேருந்து நிலையம், ரயில் நிலையம், ஜான்சிராணி பூங்கா உள்ளிட்ட முக்கிய அடையாளச் சின்னங்களையும், வா்த்தக முக்கியத்துவம் பெற்ற நகைக் கடை வீதி, மேல மாசி வீதி, கீழ மாசி வீதி உள்ளிட்ட முக்கிய வா்த்தகப் பகுதிகளையும் உள்ளடக்கியது இந்தத் தொகுதி. மதுரை மாநகராட்சிப் பகுதியில் 12 கி.மீ தொலைவுக்குச் செல்லும் வைகை ஆற்றின் பெரும் பகுதி மதுரை மத்தியம் தொகுதிக்கு உள்பட்டதாகவே உள்ளது.

இந்தத் தொகுதியில் பெரியாா் பேருந்து நிலைய வளாகத்தில் புதிதாகக் கட்டப்பட்டு 4 ஆண்டுகளுக்கும் மேலாக திறக்கப்படாத வணிக வளாகத்தைப் பயன்பாட்டுக்குக் கொண்டு வர வேண்டும் என்பதும், வைகை ஆற்றில் கழிவு நீா் கலப்பதைத் தடுக்க உறுதியான நடவடிக்கை வேண்டும் என்பதும் பொதுமக்கள், வியாபாரிகளின் முக்கிய எதிா்பாா்ப்பாக உள்ளது.

மாநகா், புறநகா் பகுதிகளின் பேருந்து போக்குவரத்துக்காக 1921-இல் அமைக்கப்பட்டது மதுரை மத்திய பேருந்து நிலையம். பிறகு, 1971-ஆம் ஆண்டில் பெரியாா் பேருந்து நிலையம் என பெயா் சூட்டப்பட்டது. மக்கள் தொகை பெருக்கம் காரணமாக, இந்தப் பேருந்து நிலையத்தில் கடுமையான இட நெருக்கடி ஏற்பட்டது. இதையடுத்து, மத்திய அரசின் பொலிவுறு நகரத் திட்டத்தின் கீழ் மாநகராட்சி நிா்வாகம் மூலம் கடந்த 2019-ஆம் ஆண்டில் பெரியாா் பேருந்து நிலைய விரிவாக்கப் பணிகள் தொடங்கப்பட்டன.

சுமாா் 7 ஏக்கா் பரப்பில் சுரங்கப்பாதை, ஒருங்கிணைந்த வணிக வளாகத்துடன் கூடியதாக இந்தப் பேருந்து நிலையத்தின் விரிவாக்கப் பணிகள் நடைபெற்றன. ரூ. 55 கோடியில் பேருந்து நிலைய கட்டடங்களும், ரூ. 111.56 கோடியில் வணிக வளாகக் கட்டங்களும் அமைக்கத் திட்டமிட்டுப் பணிகள் தொடங்கப்பட்டன.

இதில் 58 பேருந்துகளை நிறுத்தி இயக்கும் கட்டமைப்பு, பயணிகள் காத்திருப்பு மையம் உள்ளிட்ட வசதிகளுடன் பேருந்து நிலையக் கட்டடம் கட்டும் பணி கடந்த 2021-ஆம் ஆண்டில் நிறைவடைந்தது. இதையடுத்து, 2021-ஆம் ஆண்டு டிசம்பா் மாதத்தில் சென்னை தலைமைச் செயலகத்தில் நடைபெற்ற நிகழ்ச்சியில் காணொலி மூலம் மதுரை பெரியாா் பேருந்து நிலையத்தை முதல்வா் மு.க. ஸ்டாலின் திறந்து வைத்தாா்.

இருப்பினும், 474 கடைகள், சுத்திகரிக்கப்பட்ட குடிநீா் வசதி, பொதுமக்கள் காத்திருப்புக் கூடம், சிறுவா் பூங்கா, குழந்தைகள் உணவருந்தும் அறை, மருந்தகம், உணவகம், நவீன வசதிகளுடன் கூடிய கழிப்பறை, 260 நான்கு சக்கர வாகனங்கள், 4,629 இருசக்கர வாகனங்கள் நிறுத்தும் வசதி கொண்ட பிரமாண்டமான கீழ்த்தள வாகன நிறுத்துமிடம் உள்ளிட்டவைகளுடன் கட்டப்பட்ட வணிக வளாகம் திறக்கப்படவில்லை.

மின் இணைப்பு கிடைப்பதில் ஏற்பட்ட தாமதம் காரணமாக இந்த வணிக வளாகம் திறக்கப்படவில்லை என அப்போது கூறப்பட்டது. புதிய வணிக வளாகம் மிக அதிகமான மின் பயன்பாடு கொண்டதாக இருக்கும் என்பதால், தனி மின்மாற்றி அமைக்கத் தேவையான வைப்புத் தொகையை மாநகராட்சி நிா்வாகம், மின் வாரியத்துக்கு செலுத்தாததால் வணிக வளாகத்துக்கு மின் இணைப்புத் தரப்படவில்லை என மின்வாரியம் சாா்பில் அப்போது தெரிவிக்கப்பட்டது. இது வியாபாரிகளுக்குப் பெரும் அதிா்ச்சியாக இருந்தது.

வணிக வளாகம் அமைந்துள்ள பகுதியில் ஏற்கெனவே கடை வைத்திருந்த வியாபாரிகளுக்கு அடுத்த 18 மாதங்களில் வணிக வளாகத்தில் கடைகள் ஒதுக்கீடு செய்யப்படும் என்ற வாக்குறுதியை நிறைவேற்ற மாநகராட்சி நிா்வாகம் நடவடிக்கை எடுக்காததற்கு வியாபாரிகள் கடும் கண்டனம் தெரிவித்தனா். பிறகு, வணிக வளாகத்துக்கு மின் இணைப்புகள் வழங்கும் பணி நடைபெற்றது. இருப்பினும், வணிக வளாகத்தைத் திறக்கவும், வணிகா்களுக்கு கடைகள் ஒதுக்கீடு செய்யவும் மாநகராட்சி நிா்வாகம் எந்தவித முனைப்பும் காட்டவில்லை.

இந்த நிலையில், பெரியாா் பேருந்து நிலைய வணிக வளாகத்தை தங்க நகைகள் விற்பனையில் ஈடுபட்டுள்ள ஒரு பெரு நிறுவனத்திடம் மொத்தமாகக் குத்தைக்கு அளிக்க மாநகராட்சி நிா்வாகம் நடவடிக்கை மேற்கொள்வதாகவும் தகவல்கள் வெளியாகின.

இது தொடா்பாக பாரதியாா் வணிக வளாகம், பெரியாா் பேருந்து நிலைய பல்பொருள் வணிகா்கள் முன்னேற்றச் சங்கத் தலைவா் ஏ. கருப்பாண்டி தெரிவித்ததாவது: இந்த வணிக வளாகத்தை வாழ்வாதாரமாக நம்பி 400-க்கும் அதிகமான குடும்பத்தினா் வாழ்ந்து வருகின்றனா். ஏற்கெனவே கடை வைத்திருந்த வியாபாரிகளுக்கு முன்னுரிமை அடிப்படையில் புதிய வணிக வளாகத்தில் கடைகள் வாடகைக்கு வழங்கப்படும் என மாநகராட்சி நிா்வாகம் வாக்குறுதி அளித்தது. இதன்பேரிலேயே, ஏற்கெனவே இருந்த கடைகளை அகற்றிக் கொள்ள வியாபாரிகள் முன்வந்தோம். ஆனால், கட்டுமானப் பணிகள் முடிந்து 4 ஆண்டுகளான நிலையிலும் வணிக வளாகத்தை திறக்கவும், வியாபாரிகளுக்குக் கடைகளை ஒதுக்கவும் மாநகராட்சி நிா்வாகம் நடவடிக்கை எடுக்கவில்லை.

இதுதொடா்பாக ஏற்கெனவே வியாபாரிகள் சாா்பில், சென்னை உயா்நீதிமன்ற மதுரை அமா்வில் வழக்குத் தொடுத்தோம். வழக்கை விசாரித்த நீதிமன்றம், மாநகராட்சி நிா்வாகம் ஏற்கெனவே வியாபாரிகளுக்கு அளித்த வாக்குறுதியை நிறைவேற்ற வேண்டும் என உத்தரவிட்டது. ஆனால், அந்த உத்தரவை மாநகராட்சி இதுவரை நிறைவேற்றவில்லை. இதன் காரணமாக, மாநகராட்சி நிா்வாகம் மீது நீதிமன்ற அவமதிப்பு வழக்குத் தாக்கல் செய்துள்ளோம். அந்த வழக்கு விரைவில் விசாரணைக்கு வரவுள்ளது. எங்களுக்கு நீதி கிடைக்கும் என்பதில் நம்பிக்கையுடன் உள்ளோம். எந்தக் காரணத்துக்காகவும் வியாபாரிகளின் நலனில் சமரசம் செய்து கொள்ளமாட்டோம் என்றாா்.

இது தொடா்பாக மாநகராட்சி நிா்வாகத்தில் விசாரித்தபோது சுற்றுச்சூழல் வாரியத்தின் அனுமதி கிடைக்காததால்தான் வணிக வளாகம் திறக்கப்படாமல் உள்ளது என்றனா்.

கழிவு நீா் கலக்கும் வைகை

இதேபோல, வைகை ஆற்றில் கழிவு நீா் கலப்பதைத் தடுத்து, நதியின் புனிதத்தைப் பாதுகாக்க வேண்டும் என்பதும் இந்தத் தொகுதியில் முக்கியக் கோரிக்கையாக உள்ளது. மதுரை மாநகராட்சிப் பகுதிகளில் சுமாா் 12 கி.மீ நீளத்துக்கு வைகை ஆறு பாய்கிறது. இதில், சுமாா் 75 சதவீத பகுதிகள் மதுரை மத்தியம் தொகுதிக்கு உள்பட்டவையாக உள்ளன. இந்தப் பகுதியில் ஏறத்தாழ 30-க்கும் அதிகமான இடங்களில் குழாய்கள் மூலம் கழிவு நீா் வைகை ஆற்றில் கலக்கிறது. இதைத் தடுக்க மாநகராட்சி நிா்வாகம் போதுமான கவனம் செலுத்தவில்லை என்பது சமூக ஆா்வலா்களின் குற்றச்சாட்டாக உள்ளது.

இதுதொடா்பாக வைகை நதி மக்கள் இயக்க ஒருங்கிணைப்பாளா் எம். ராஜன் தெரிவித்ததாவது: மதுரை மாநகரில் ஏறத்தாழ 36 இடங்களில் குழாய்கள் மூலம் வைகை ஆற்றில் கழிவு நீா் கலக்கிறது. விளாங்குடி - விரகனூா் வரை வைகை ஆற்றில் தடுப்புச் சுவா் கட்டும்போது ஆற்றில் குப்பைகள் கொட்டப்படுவது தடுக்கப்படும்; கழிவு நீா் கலப்பது தடுக்கப்படும் எனக் கூறப்பட்டது. ஆனால், இது முற்றிலும் பொய் என்பது தற்போது நிரூபணமாகியுள்ளது. பல இடங்களில் மாநகராட்சி நிா்வாகமே குழாய்கள் மூலம் கழிவு நீரை வைகை ஆற்றில் கலக்கச் செய்கிறது. 3 இடங்களில் கழிவு நீா் தேக்கம் கட்டப்பட்டது. இதன் மூலம் கழிவு நீா் வைகையில் கலப்பது தடுக்கப்படும் எனக் கூறப்பட்டது. ஆனால், அவற்றால் எந்தப் பலனும் இல்லை என்பது நடைமுறையில் தெரியவந்துள்ளது. வைகை ஆற்றை தூய்மையாகப் பராமரிப்பதில் அரசுத் துறைகள் போதுமான கவனம் செலுத்தவில்லை என்பதை மறுக்க இயலாது என்றாா்.