பெருமாள் கோயில்களில் சிறப்பு தரிசனம்

புரட்டாசி இரண்டாவது சனிக்கிழமையை முன்னிட்டு, திண்டுக்கல் மாவட்டத்தில் உள்ள பெருமாள் கோயில்களில் ஏராளமான பக்தர்கள் சிறப்பு தரிசனம் செய்தனர்.

   திண்டுக்கல் மலையடிவாரம் அருள்மிகு ஸ்ரீநிவாசப் பெருமாள் திருக்கோயில் மூலவருக்கு திருமஞ்சனம் செய்து, சிறப்பு அலங்காரம் நடைபெற்றது. மாலையில், மூலவர் ராஜ அலங்காரத்துடனும், ஸ்ரீதேவி பூதேவி சமேதராய் உற்சவர் ஸ்ரீநிவாசப் பெருமாள் புஷ்ப அலங்காரத்திலும் பக்தர்களுக்கு அருள்பாலித்தார்.

  ரெட்டியார்சத்திரம் பகுதியில் அமைந்துள்ள அருள்மிகு கோபிநாத சுவாமி திருக்கோயிலில் மூலவர் கோபிநாதருக்கு சிறப்பு அலங்காரம் செய்யப்பட்டிருந்தது. பக்தர்கள் சார்பில் வழங்கப்பட்ட பால், தயிர், பன்னீர் உற்சவருக்கு நாள் முழுவதும் அபிஷேகம் செய்யப்பட்டது.  ரெட்டியார்சத்திரம் அருள்மிகு கதிர் நரசிங்கப் பொருமாள் கோயிலில் மூலவருக்கு வெண்ணைக் காப்பு அலங்காரம் செய்யப்பட்டிருந்தது. சின்னாளபட்டி அருள்மிகு அஞ்சலிவரத ஆஞ்சநேயருக்கு தியான மாருதி ராஜ அலங்காரம் செய்யப்பட்டிருந்தது. சிம்மாசனத்தில் தியான நிலையில் அமர்ந்திருந்த சுவாமிக்கு, பல்வேறு ஆபரணங்கள் பூட்டப்பட்டு அலங்காரம் செய்யப்பட்டிருந்தது. 

  தாடிக்கொம்பு அருள்மிகு சௌந்தரராஜப் பெருமாள் திருக்கோயில், குஜிலியம்பாறை அடுத்துள்ள ஸ்ரீராமகிரி அருள்மிகு கல்யாண நரசிங்கப் பெருமாள் திருக்கோயில், வடமதுரை அருள்மிகு சௌந்தரராஜப் பெருமாள் திருக்கோயில்களில் நடைபெற்ற புரட்டாசி சனிக்கிழமை வழிபாட்டிலும் ஏராளமானோர் கலந்துகொண்டு சுவாமி சிறப்பு தரிசனம் செய்தனர்.