திண்டுக்கல்லில் ஆளுநர் திறந்து வைத்த பூங்கா 3 நாள்களில் மூடல்: ஏமாற்றத்துடன் திரும்பும் பொதுமக்கள்

தமிழக ஆளுநர் திறந்து வைத்த பூங்கா மூன்றே நாள்களில் மூடப்பட்டுவிட்டதால், அங்கு செல்லும் பொதுமக்கள் ஏமாற்றத்துடன் திரும்புகின்றனர். 
      திண்டுக்கல் ஆர்எம்.காலனி பகுதியில் அம்ரூத் திட்டத்தின் கீழ் (2016-17), ரூ.1.20 கோடி செலவில் பூங்கா அமைக்கும் பணி நடைபெற்று வந்தது. பல மாதங்களாக பணிகள் நடைபெற்று வந்த நிலையில், கடந்த மாதம் திண்டுக்கல் நகருக்கு வந்த தமிழக ஆளுநர் பன்வாரிலால் புரோஹித் இந்த பூங்காவை பொதுமக்களின் பயன்பாட்டுக்காக திறந்து வைத்தார்.
    திறப்பு விழாவைத் தொடர்ந்து 3 நாள்கள் மட்டுமே பொதுமக்களின் பயன்பாட்டில் பூங்கா இருந்தது. அதன்பின்னர், பூங்காவில் பணிகள் நடைபெறுவதாகக் கூறி, மாநகராட்சி நிர்வாகம் பூட்டி வைத்துள்ளது.
     இதனிடையே, ஆளுநரின் வருகைக்காக அமைக்கப்பட்டிருந்த இருக்கைகள், கொண்டு வரப்பட்ட இடத்துக்கே திருப்பி எடுத்துச் செல்லப்பட்டுள்ளன. இதையறிந்த அப்பகுதியினர், மாநகராட்சி நிர்வாகத்தின் மீது கடும் அதிருப்தி அடைந்துள்ளனர்.
     இது தொடர்பாக பொதுமக்கள் கூறியது: ஆளுநர் வருகையையொட்டி,  மாநகராட்சி ஆணையர் தலைமையில் 2 நாள்களாக இந்த பூங்காவில் பணிகள் துரிதமாக நடைபெற்றன. மர இருக்ககைகள், சிறுவர்களுக்கான ஊஞ்சல், செயற்கை நீருற்று, பூச்செடிகள் என பூங்கா முழுவதும் வண்ணமயமாகக் காட்சி அளித்தது.
     ஆளுநர் சென்ற 3 நாள்களில், இவை அனைத்தும் அகற்றப்பட்டதுடன், பொதுமக்களும் பூங்காவுக்குள் அனுமதிக்கப்படவில்லை.     இதையறியாத பிற பகுதிகளைச் சேர்ந்த பொதுமக்கள் பலரும், ஆளுநர் திறந்து வைத்த பூங்கா என்ற எதிர்பார்ப்பில் மாலை நேரங்களில் ஆர்எம்.காலனி அம்ரூத் பூங்காவுக்கு வருகின்றனர். பூங்கா மூடப்பட்டிருப்பதை பார்த்து ஏமாற்றத்துடன் திரும்பிச் செல்கின்றனர் எனத் தெரிவித்தனர்.
     இது குறித்து மாநகராட்சி அலுவலர் ஒருவர் கூறியது:  பூங்காவுக்குள் அமைந்துள்ள கிணற்றுக்கு சுற்றுச் சுவர் கட்டும் பணிகள் நடைபெற வேண்டியுள்ளது. ஆளுநரின் திடீர் வருகையையொட்டி, கிணற்றைச் சுற்றிலும் தற்காலிக மறைப்பு ஏற்படுத்தப்பட்டிருந்தது. அதேபோல், இருக்கை வசதியும் கூடுதலாக ஏற்படுத்த வேண்டிய நிலை உள்ளது. அதனாலேயே, பொதுமக்கள் அனுமதிக்கப்படாமல் மூடி வைக்கப்பட்டுள்ளது.
     இந்தப் பணிகளை விரைவாக முடித்து, பூங்கா பராமரிப்பு தனியார்வசம் ஒப்படைக்கப்படும் என்றார்.