தாடிக்கொம்பு அருகே கோயில் உண்டியல் திருட்டு: 2 இளைஞர்கள் கைது

தாடிக்கொம்பு சௌந்தரராஜப் பெருமாள் கோயிலில் 3 உண்டியல்களை திருடிச் சென்ற 2 இளைஞர்களை போலீஸார் வியாழக்கிழமை கைது செய்தனர்.
திண்டுக்கல்லை அடுத்துள்ள தாடிக்கொம்பு சௌந்தராஜப் பெருமாள் கோயில் வளாத்திற்குள் கடந்த திங்கள்கிழமை புகுந்த மர்ம நபர்கள்,  தன்வந்திரி,  லட்சுமி நரசிம்மர்,  ஆண்டாள் சன்னதிகளிலிருந்த 3 உண்டியல்களை திருடிச் சென்றனர். திருடு போன 3 உண்டியல்களும் உடைக்கப்பட்டு தாடிக்கொம்பு அடுத்துள்ள கொடகனாற்றில் கிடந்தன. இதுகுறித்து தாடிக்கொம்பு போலீஸார் வழக்குப் பதிவு செய்து விசாரித்து வந்தனர்.
 இந்நிலையில், உண்டியல் திருட்டில் ஈடுபட்ட தாடிக்கொம்பு பகுதியைச் சேர்ந்த கருப்பையா மகன் ராஜபாண்டி (20),  கோவிந்தராஜ் மகன் விசுவநாத் (18) ஆகியோரை போலீஸார் வியாழக்கிழமை கைது செய்தனர்.