கொடைக்கானலில்  பள்ளி மாணவர்களுக்கு  தடகளப் போட்டி

கொடைக்கானலில் பள்ளிகளுக்கு இடையேயான விளையாட்டுப் போட்டிகள் செவ்வாய், புதன்கிழமைகளில் நடைபெற்றன.
 பழனி கல்வி மாவட்டம் உள்ளடக்கிய கொடைக்கானல் டி பிரிவு குறுவட்ட அளவிலான விளையாட்டுப் போட்டிகள் கொடைக்கானல் மூஞ்சிக்கல் பகுதியிலுள்ள அரசு மேல்நிலைப் பள்ளியில் நடைபெற்றன.
  இப்போட்டியில் கொடைக்கானல் பகுதியைச் சேர்ந்த அரசு, அரசு உதவி பெறும் பள்ளி, தனியார் பள்ளிகள் உள்ளிட்ட 27 பள்ளிகளைச் சேர்ந்த 500-க்கும் மேற்பட்ட மாணவ, மாணவிகள் கலந்து கொண்டனர்.   போட்டியை கொடைக்கானல் மின்வாரியத்துறை உதவிபொறியாளர் மேத்யூ தொடங்கி வைத்தார். பாம்பார்புரம் புனித தெரசாள் உயர்நிலைப் பள்ளி தலைமை ஆசிரியை மேரி முன்னிலை வகித்தார்.  நீளம் தாண்டுதல், உயரம் தாண்டுதல், குண்டு எறிதல், வட்டு எறிதல் மற்றும் 100 மீ., 200 மீ., 400 மீ., 800.மீ ஓட்டம் உள்ளிட்ட தடகளப் போட்டிகள் நடைபெற்றன. போட்டிகளில் வெற்றி பெற்ற மாணவ, மாணவிகளுக்கு பரிசுகள் வழங்கப்பட்டன.