கொடைக்கானல் அருகே பள்ளி தொடக்க விழா

கொடைக்கானல் அருகே புதிய தொடக்கப்பள்ளி ஆரம்பிக்கப்பட்டு, அதன் தொடக்க விழா புதன்கிழமை நடைபெற்றது.
 வில்பட்டி ஊராட்சி பெருங்காடு ஆலத்துரைப் பகுதியில் ஆதிவாசிகள் அதிக அளவில் வசித்து வருகின்றனர். இப்பகுதி குழந்தைகள் சுமார் 10 கி.மீ. தூரமுள்ள பள்ளங்கி பகுதி அரசுப் பள்ளிக்கு நடந்தே சென்று படித்து வந்தனர். இதையடுத்து பெருங்காடு பகுதியில் அரசு சார்பில் ஊராட்சி ஒன்றிய தொடக்கப் பள்ளி தொடங்க வேண்டும் என பல ஆண்டுகளாக அப்பகுதியைச் சேர்ந்த பொதுமக்கள் கோரிக்கை விடுத்து பல்வேறு போராட்டங்களை நடத்தி வந்தனர்.
 இந்நிலையில் கொடைக்கானல் ஊராட்சி ஒன்றியம் சார்பில் ஊராட்சி  ஒன்றிய தொடக்கப் பள்ளி ஆரம்பிக்கப்பட்டு, இப்பள்ளியின் தொடக்க விழா புதன்கிழமை நடைபெற்றது.
  விழாவுக்கு கொடைக்கானல் வட்டார கல்வி மைய அலுவலர் தியாகராஜன் தலைமை வகித்தார். பள்ளி தலைமை ஆசிரியை சூர்ய பிரபா வரவேற்றார். கொடைக்கானல் சுழற் சங்கத் தலைவர் (தேர்வு) செல்வக்குமார் பள்ளியை குத்துவிளக்கேற்றி தொடக்கி வைத்தார்.
 இந்நிகழ்ச்சியில் தொண்டு நிறுவனத்தைச் சேர்ந்த அண்ணாத்துரை, கீஸ்மோகன், மைக்கேல், பி.சி.கே.பள்ளியைச் சேர்ந்த சவரினா, சாந்தம் சதீஸ், சேது முருகன், தலைமை ஆசிரியர் பிரேம் குமார் உள்ளிட்ட பலர் கலந்து கொண்டனர்.விழாவில் பள்ளிக் குழந்தைகளின் கலை நிகழ்ச்சிகள் நடைபெற்றது. ஆசிரியை பாண்டியம்மாள் நன்றி கூறினார்.