அனுமதியின்றி விநாயகர் சிலை அமைக்க முயற்சி: இந்து முன்னணியினர் 45 பேர் கைது

திண்டுக்கல்லில் அனுமதியின்றி விநாயகர் சிலை வைக்க முயன்ற இந்து முன்னணியினர் 45 பேரை போலீஸார் வியாழக்கிழமை கைது செய்தனர்.
திண்டுக்கல் குடைப்பாறைப்பட்டியில் உள்ள காளியம்மன் பகவதியம்மன் கோயிலில், சதுர்த்தி விழாவையொட்டி விநாயகர் சிலை வைப்பதற்கு இந்து முன்னணி சார்பில் முயற்சி மேற்கொள்ளப்பட்டது. ஆனால் அங்கு விநாயகர் சிலை வைப்பதற்கு வட்டாட்சியர்  அனுமதி வழங்கவில்லை. ஆனால் இந்து முன்னணியினர் தடையை மீறி சிலை வைப்பதற்கான நடவடிக்கைளை மேற்கொண்டனர்.
 இதனையடுத்து,  காளியம்மன் கோயில் வளாகத்தில் ஏராளமான போலீஸார் குவிக்கப்பட்டனர். அப்போது விநாயகர் சிலையுடன் ஊர்வலமாக வந்த இந்து முன்னணியினரை போலீஸார் வழிமறித்து, சிலையை கைப்பற்றினர். 
பின்னர் அனுமதியின்றி சிலை வைக்க முயன்றதாக, இந்து முன்னணி மாவட்ட செயலர்கள் சஞ்சீவி, வீரதிருமூர்த்தி, பாலசங்கர் உள்ளிட்ட 45 பேரை போலீஸார் கைது செய்தனர்.  இந்த சம்பவத்தால்,  குடைப்பாறைப்பட்டி பகுதியில் சிறிது நேரம் பரபரப்பு ஏற்பட்டது.