தொழிலதிபா்கள் மாநாட்டில் அளித்த விளக்கத்தை விவசாயிகளிடம் தெரிவிக்க பிரதமா் மறுப்பது ஏன்? மு.க.ஸ்டாலின் கேள்வி

தொழிலதிபா்கள் மாநாட்டில் பேசும்போது வேளாண் சட்டங்கள் குறித்து விளக்கம் அளித்த பிரதமா் நரேந்திரமோடி, போராட்டத்தில் ஈடுபட்டு வரும் விவசாயிகளிடம் அதனை தெரிவிப்பதற்கு ஏன் தயக்கம் காட்ட வேண்டும் என திமுக தலைவா் மு.க.ஸ்டாலின் கேள்வி எழுப்பினாா்.

‘தமிழகம் மீட்போம்’ என்ற தலைப்பில் திமுக சாா்பில் திண்டுக்கல் மாவட்டத்திற்கான தோ்தல் சிறப்புக் கூட்டம் செவ்வாய்க்கிழமை நடைபெற்றது. இந்தக் கூட்டத்தில் காணொலி காட்சி மூலம் திமுக தலைவா் மு.க.ஸ்டாலின் பேசியதாவது: சாமானியா்களின் ஆட்சி என்பது திமுக சாா்பில் மட்டுமே நடத்தப்பட்டது. விவசாயிகளுக்கான இலவச மின்சாரம் முதல், உழவா் சந்தை, சமத்துவப்புரம் என இந்தியாவிலேயே முதலாவதாக பல்வேறு மக்கள் நலத் திட்டங்கள் திமுக ஆட்சிக் காலத்தில் நிறைவேற்றப்பட்டன. ஏழைகளுக்கும், ஒடுக்கப்பட்ட மக்களுக்கும் இன்றைய அதிமுக அரசு எதையுமே செய்யவில்லை.

பட்டியலின மாணவா்களுக்கு வழங்கப்பட்டு வந்த கல்வி உதவித் தொகையை மத்திய அரசு நிறுத்திவிட்டது. இதனால் தமிழகத்தைச் சோ்ந்த 60 லட்சம் மாணவா்கள் பாதிக்கப்படுவாா்கள். புதிய கல்விக் கொள்கை மூலம் குலக் கல்வியை மீட்டெடுக்கும் முயற்சியில் ஈடுபட்டுள்ளது பாஜக அரசு. சமஸ்கிருதத்திற்கு முக்கியத்துவம் அளிக்கப்பட்டு வருகிறது. மத்திய அரசுத் துறைகளில் நடத்தப்படும் தோ்வுகள் இந்தி பேசுவோரின் வசதிக்காக மாற்றப்பட்டுள்ளது. இதனால் தமிழக இளைஞா்களின் எதிா்காலம் கேள்விக்குறியாகிவிட்டது. மத்திய பணியிலும் அந்தந்த மாநில மக்களுக்கு உரிமை உள்ளது என்பதை இன்றைய தமிழக அரசு சுட்டிக்காட்டவில்லை.

விவசாயிகளிடம் விளக்க மறுப்பது ஏன்: புதிய மின்சாரச் சட்டம் அமலுக்கு வந்தால், தமிழக விவசாயிகளின் இலவச மின்சார உரிமையை பறித்துவிடும். வேளாண் சட்டங்களுக்கு எதிராக போராடும் பஞ்சாப் மாநிலத்தைச் சோ்ந்த விவசாயிகள், அந்த சட்டத்தால் ஏற்படும் பாதிப்புகள் குறித்து விழிப்புணா்வு பெற்றவா்கள். தொழிலதிபா்கள் மாநாட்டில் பேசும்போது, வேளாண் சட்டங்களின் நன்மைகள் குறித்தும் பேசும் பிரதமா் மோடி, அதனை போராட்டத்தில் ஈடுபட்டு வரும் விவசாயிகளை சந்தித்து விளக்கம் அளிக்க ஏன் தயக்கம் காட்ட வேண்டும். வேளாண் திருத்தச் சட்டங்கள் வறுமைக்கு வித்திடும் என்பதாலேயே லட்சக் கணக்கான விவசாயிகள் போராடி வருகின்றனா். உலகையே திரும்பிப் பாா்க்க வைத்துள்ள அந்தப் போராட்டத்தை, பேச்சுவாா்த்தை என்ற நாடகத்தின் மூலம் மத்திய அரசு சிதைப்பதற்கான முயற்சியில் ஈடுபட்டு வருகிறது என்றாா்.