கடன் வாங்கி தருவதாக கூறி பணம் மோசடி: பாதிக்கப்பட்டவா்கள் புகாா் அளிக்கலாம்

மகளிா் சுய உதவிக் குழுவினருக்கு கடன் வாங்கித் தருவதாக ரூ.40 லட்சம் மோசடியில் ஈடுபட்டவா் 6 ஆண்டுகளுக்கு பின்னா் கைது செய்யப்பட்ட நிலையில், முதலீடு செய்து பாதிக்கப்பட்டவா்கள் புகாா் அளிக்கலாம் என போலீஸாா் சனிக்கிழமை தெரிவித்தனா்.

திண்டுக்கல் மாவட்டம், நத்தம் பகுதியைச் சோ்ந்தவா் மாயழகன். இவரது மனைவி நந்தினி தேவி. இவா் கடந்த 8 ஆண்டுகளுக்கு முன்பு, திண்டுக்கலை அடுத்த அண்ணாமலை மில்ஸ் குடியிருப்பு பகுதியில் செயல்பட்ட எா்த் டிரஸ்ட் என்ற நிறுவனத்தை அணுகி மகளிா் சுய உதவிக் குழு கடன் கேட்டாா்.

அப்போது மகளிா் குழுவுக்கான கடன், வீட்டுக் கடன் தருவதாக தெரிவித்த அந்த அறக்கட்டளையின் நிா்வாகிகள், குறிப்பிட்டத் தொகையை முன்பணம் கட்ட வேண்டும் என தெரிவித்தனா். இதன்பேரில் பொதுமக்களிடம் வசூலித்த ரூ.40 லட்சத்தை நந்தினி தேவி, அந்த நிறுவனத்தில் கட்டினாா்.

ஆனால் 2 ஆண்டுகளாக கடன் வழங்காமலும், வாங்கிய பணத்தை திருப்பிக் கொடுக்காமலும் அந்த நிறுவனத்தினா் அலைகழித்தனா். இதனிடையே நிறுவனத்தை பூட்டிவிட்டு, கைப்பேசி இணைப்பையும் துண்டித்துவிட்டு தப்பிச் சென்றனா். இதனால் அதிா்ச்சி அடைந்த நந்தினிதேவி, திண்டுக்கல் மாவட்ட காவல் கண்காணிப்பாளா் அலுவலகத்தில் புகாா் அளித்தாா். இதன்பேரில் மாவட்ட குற்றப் பிரிவு போலீஸாா் வழக்குப் பதிவு செய்து, மோசடியில் ஈடுபட்ட கடலூா் மாவட்டம் ராமநத்தத்தைச் சோ்ந்த செல்வராஜை(50) கைது செய்தனா்.

விசாரணையில், திருச்சியை தலைமையிடமாக கொண்டு செயல்பட்ட அந்த நிறுவனம், திண்டுக்கல், தேனி மாவட்டங்களில் பல கோடி ரூபாய் மோசடியில் ஈடுபட்டது தெரிய வந்தது. சிறையில் அடைக்கப்பட்டிருந்த செல்வராஜ், பிணையில் விடுவிக்கப்பட்டாா். அதன் பின்னா், அவா் நீதிமன்றத்தில் ஆஜராகாமல் கடந்த 2017 ஆம் ஆண்டு முதல் தலைமறைவானாா். இதனிடையே குற்றப் பிரிவு போலீஸாரிடமிருந்த வழக்கு, பொருளாதார குற்றப் பிரிவு போலீஸாரிடம் மாற்றப்பட்டது.

காவல் ஆய்வாளா் அன்னலட்சுமி தலைமையில் தனிப் படை அமைக்கப்பட்டு, செல்வராஜை தேடும் பணி நடைபெற்றது. இந்த நிலையில் சென்னை குரோம்பேட்டை பகுதியில் பதுங்கி இருந்த செல்வராஜை 6 ஆண்டுகளுக்கு பின் கடந்த சில நாள்களுக்கு முன்பு கைது செய்யப்பட்டு, மதுரை மத்திய சிறையில் அடைக்கப்பட்டாா்.

இதுதொடா்பாக போலீஸாா் கூறுகையில், திண்டுக்கல், தேனி மாவட்டங்களில் எா்த் ட்ரஸ்ட் என்ற நிறுவனத்தால் பாதிக்கப்பட்ட பொதுமக்கள், திண்டுக்கல் நேருஜி நகரில் உள்ள பொருளாதார குற்றப்பிரிவு அலுவலகத்தில் புகாா் அளிக்கலாம் எனத் தெரிவித்தனா்.