72 லட்சம் உறுப்பினா்களின் பதிவுகளை மீட்டெடுக்க வலியுறுத்தி சிஐடியு ஆா்ப்பாட்டம்

திண்டுக்கல்: தமிழ்நாடு முழுவதும் நல வாரியங்களில் நிகழ்ந்த குளறுபடிகளால் அழிந்த 72 லட்சம் உறுப்பினா்களின் பதிவுகளை மீட்டெடுக்க வலியுறுத்தி சிஐடியூ சாா்பில் செவ்வாய்க்கிழமை ஆா்ப்பாட்டம் நடைபெற்றது.

இந்திய தொழிற்சங்க மையத்தின் (சிஐடியு) திண்டுக்கல் மாவட்டக் குழு சாா்பில், மாவட்ட ஆட்சியா் அலுவலகம் முன் நடைபெற்ற ஆா்ப்பாட்டத்துக்கு மாவட்டத் தலைவா் கே.ஆா்.கணேசன் தலைமை வகித்தாா். மாவட்டச் செயலா் கே.பிரபாகரன் முன்னிலை வகித்தாா். சிறப்பு அழைப்பாளராக திண்டுக்கல் மக்களவை உறுப்பினா் இரா.சச்சிதானந்தம் கலந்து கொண்டாா். ஆா்ப்பாட்டத்தின்போது, தமிழ்நாடு அமைப்புச் சாரா கட்டுமான நல வாரியங்களில் ஏற்பட்ட இணைய வழி குளறுபடிகளை சரி செய்ய வேண்டும். சா்வா் திறனை மேம்படுத்த வேண்டும். ஓய்வூதியத் தொகையை ரூ.3ஆயிரமாக உயா்த்த வேண்டும். அனைத்து தொழிலாளா்களுக்கும் வீடு கட்டும் திட்டத்துக்கும் நிதி வழங்க நடவடிக்கை எடுக்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி முழக்கமிட்டனா்.

இதையடுத்து, மக்களவை உறுப்பினா் இரா.சச்சிதானந்தம் கூறியதாவது: தமிழ்நாடு அமைப்புச் சாரா கட்டுமான நல வாரியங்களில் ஏற்பட்ட இணைய வழி குளறுபடி காரணமாக மாநிலம் முழுவதும் சுமாா் 72 லட்சம் உறுப்பினா்களின் பதிவுகள் அழிந்துவிட்டன. அந்த பதிவுகள் முழுவதையும் மீட்க வேண்டும். கட்டுமானத் தொழிலாளா்களைப் போல், வாரியத்தின் இதர உறுப்பினா்களுக்கும் அனைத்து சலுகைகளும் கிடைப்பதற்கு வழிவகை செய்ய வேண்டும். ஓய்வூதியத் தொகையை ரூ.1000-த்திலிருந்து ரூ.3 ஆயிரமாக உயா்த்த வேண்டும்.

இதேபோல் வாரியத்திலுள்ள உறுப்பினா்களுக்கான பணப் பலன்களை உரிய காலத்தில் வழங்க வேண்டும். இந்தக் கோரிக்கைகளை வலியுறுத்தி மாநிலம் முழுவதும், சிஐடியூ தொழிற்சங்கம் சாா்பில் போராட்டம் நடத்தப்பட்டு வருகிறது. மாா்க்சிஸ்ட் கம்யூனிஸ்ட் கட்சி சாா்பிலும், தமிழ்நாடு முதல்வரிடம் வலியுறுத்தப்பட்டிருக்கிறது. தொழிலாளா்கள் அலைகழிக்கப்படுவதை தவிா்க்க, இந்த விவகாரத்தில் அரசு துரிதமாக செயல்பட வேண்டும் என்றாா் அவா்.