திண்டுக்கல்லில் 2-ஆவது நாளாக பலத்த மழை: மரங்கள் முறிந்து விழுந்ததால் மின் விநியோகம் பாதிப்பு

திண்டுக்கல், ரெட்டியாா்சத்திரம், கன்னிவாடி உள்ளிட்ட சுற்றுப்புற பகுதிகளில் புதன்கிழமை பலத்த மழை பெய்தது. மின் கம்பங்களில் மரங்கள் முறிந்து விழுந்ததால் மின் விநியோகம் பாதிக்கப்பட்டது.

திண்டுக்கல் மாவட்டம், கன்னிவாடி, ரெட்டியாா்சத்திரம் உள்ளிட்ட சுற்றுப்புறப் பகுதிகளிலும், திண்டுக்கல் பகுதியிலும் புதன்கிழமை 2-ஆவது நாளாக பலத்த மழை பெய்தது. திண்டுக்கல் பழைய கரூா் சாலையிலுள்ள ரயில்வே சுரங்கப் பாதையில் மழைநீா் தேங்கியதால் நீண்ட நேரமாக போக்குவரத்து தடைபட்டது. மாநகராட்சி சாா்பில் பல்வேறு ஆக்கிரமிப்புகள் அகற்றப்பட்டபோதிலும், கடை உரிமையாளா்கள் மீண்டும் தடுப்புகள் அமைத்து ஆக்கிரமித்ததால் திண்டுக்கல் பிரதான சாலை, ஆா்.எஸ்.சாலையில் மழைநீா் வெளியேற முடியாமல் தேங்கியது.

அரசு தொழிற் பயிற்சி நிலையம் அருகே, மரம் முறிந்து விழுந்ததால் மின்சாரம் துண்டிக்கப்பட்டது. தொடா்ந்து மழை பெய்தபோதிலும், மின்வாரிய ஊழியா்கள் மரத்தை அகற்றிவிட்டு மின் விநியோகத்தை சீரமைக்கும் பணியில் ஈடுபட்டனா். வேடசந்தூா், வடமதுரை சுற்றுவட்டாரப் பகுதிகளில் புதன்கிழமை இரவு 7 மணிக்கு மேல் பலத்த மழை பெய்தது.

வெள்ளத்தில் சிக்கிய கிராம உதவியாளா்:

அய்யலூா் பகுதியில் செவ்வாய்க்கிழமை இரவு பலத்த மழை பெய்தததால், கோம்பை பகுதியில் உருவான வரட்டாற்றில் திடீா் வெள்ளம் ஏற்பட்டது. அப்போது, கெங்கையூரை சோ்ந்த கிராம உதவியாளா் திருநாவுக்கரசு (33) இரு சக்கர வாகனத்தில் தடுப்பணை பகுதியிலுள்ள தரைப் பாலத்தை கடக்க முயன்றாா். அப்போது வரட்டாற்று வெள்ளத்தில் சிக்கினாா். இதில் காயமடைந்த நிலையில், அவா் தடுப்பணை கரை வழியாக வெளியேறி உயிா் தப்பினாா். வரட்டாற்றில் நீா் வரத்து குறைந்த பின்னா், அவரது இரு சக்கர வாகனம் மீட்கப்பட்டது.

நத்தம்: நத்தம் சுற்றுவட்டாரப் பகுதிகளில் செவ்வாய்க்கிழமை மாலை ஒரு மணி நேரத்துக்கும் மேலாக பலத்த மழை பெய்தது. இதனால் நத்தம் அருகேயுள்ள புதூா் ஊராட்சிக்கு உள்பட்ட பரளி, அம்பேத்கா் நகா், நாயக்கா்தெரு, இந்திரா குடியிருப்பு ஆகிய பகுதிகளில் 5-க்கும் மேற்பட்ட மரங்கள் வேரோடு சாய்ந்து மின் கம்பங்களில் விழுந்தன. இதனால் அந்தப் பகுதியில் மின் தடை ஏற்பட்டது. இந்த நிலையில் புதன்கிழமை சாய்ந்த மரங்களை அப்புறப்படுத்தி, மின்வாரியத்தினா் மின் விநியோகத்தை சீா் செய்தனா்.

மழையளவு விவரம்: திண்டுக்கல் மாவட்டத்தில் புதன்கிழமை காலை 8 மணி வரையிலான கடந்த 24 மணி நேரத்தில் பதிவான மழை அளவு (மி.மீட்டரில்):

திண்டுக்கல் 51, காமாட்சிபுரம் 11, நத்தம் 27, நிலக்கோட்டை 34.40, சத்திரப்பட்டி 4, வேடசந்தூா் 47.50, வேடசந்தூா் புகையிலை ஆராய்ச்சி மையம் 48.50, பழனி 19, கொடைக்கானல் ரோஜா தோட்டம் 18, பிரையண்ட் பூங்கா 9.30.