பாலாலய யாக பூஜைகள் தொடக்கம்

திண்டுக்கல் கோட்டை மாரியம்மன் கோயிலில் திருப்பணிகள் நடைபெறுவதையொட்டி, பாலாலயத்துக்கான யாக பூஜைகள் வியாழக்கிழமை தொடங்கின.

கோட்டை மாரியம்மன் கோயிலில் கடந்த 2003-ஆம் ஆண்டு குடமுழுக்கு நடத்தப்பட்டது. மீண்டும் கோயிலில் திருப் பணிகள் செய்து குடமுழுக்கு நடத்துவதற்கு கோயில் நிா்வாகம் திட்டமிட்டது. அதன்படி, மூலவா், பரிவார தெய்வங்களுக்கான பாலாலயம் செய்யும் நிகழ்ச்சி வருகிற 26-ஆம் தேதி நடைபெறுகிறது. இந்த பாலாலயத்துக்கான யாக பூஜைகள் வியாழக்கிழமை தொடங்கின.

கணபதி ஹோமத்தைத் தொடா்ந்து, விக்னேஸ்வர பூஜை, புண்யாக வாஜனம், நவகிரக ஹோமம், கோ பூஜை நடத்தப்பட்டு, தீபாராதனை காண்பிக்கப்பட்டது. இதன் தொடா்ச்சியாக 4 கால யாக பூஜைகள் நடத்தப்படுகின்றன. அத்தி மரத்தால் செய்யப்பட்ட அம்மன் சிலையை கோயில் திருமண மண்டபத்தில் வைத்து, அதில் அம்மனின் சக்தியை உருவேற்றம் செய்யும் பூஜைகள் நடைபெறுகின்றன.

குடமுழுக்கு திருப்பணிகள் நடைபெறுவதன் காரணமாக, நிகழாண்டுக்கான மாசிப் பெருவிழா நடைபெறாது என தெரிவிக்கப்பட்டது.