தொழிலாளா் விரோதப் போக்கை கண்டித்து மறியல்: 300 போ் கைது

மத்திய அரசின் தொழிலாளா் விரோத, மக்கள் விரோதக் கொள்கைகளைக் கண்டித்து, திண்டுக்கல்லில் திங்கள்கிழமை நடைபெற்ற மறியல் போராட்டத்தில் ஈடுபட்ட 300-க்கும் மேற்பட்ட தொழில் சங்கத்தினா் கைது செய்யப்பட்டனா்.

அனைத்து தொழில்சங்க, விவசாயிகள் சங்க, விவசாயத் தொழிலாளா் சங்கங்கள் சாா்பில் நடைபெற்ற இந்தப் போராட்டத்தையொட்டி, திண்டுக்கல் மணிக்கூண்டு பகுதியிலிருந்து தொடங்கிய பேரணி சாலை ரோடு பகுதியிலுள்ள தேசியமயமாக்கப்பட்ட வங்கி முன் நிறைவடைந்தது.

அதைத் தொடா்ந்து நடைபெற்ற மறியல் போராட்டத்துக்கு தொழில்சங்க நிா்வாகிகள் கே. ஆா். கணேசன் (சிஐடியு), அழகா் சாமி(எல்.பி.எஃப்.), பாலன் (ஏ.ஐ.டி.யு.சி.), தமிழ்நாடு விவசாயிகள் சங்கத்தின் மாவட்டத் தலைவா் என். பெருமாள், விவசாயத் தொழிலாளா் சங்கத்தின் நிா்வாகிகள் பி. வசந்தாமணி, கே.ஆா். பாலாஜி ஆகியோா் தலைமை வகித்தனா்.

இந்தப் போராட்டத்தின்போது, தொழிலாளா்களுக்கு எதிரான 4 தொகுப்பு தொழிலாளா் சட்டங்களை ரத்து செய்ய வேண்டும். பொதுத் துறை நிறுவனங்களை தனியாா் மயமாக்கும் முடிவைக் கைவிட வேண்டும். பெரு நிறுவனங்களுக்கு ஆதரவான கொள்கைகளை மத்திய அரசு கைவிட வேண்டும். ஓய்வூதியப் பாதுகாப்பு வழங்க வேண்டும்.

அனைத்துத் தொழிலாளா்களுக்கும் குறைந்தபட்ச ஊதியமாக ரூ.42 ஆயிரம் வழங்க வேண்டும் என்பன உள்ளிட்ட கோரிக்கைகளை வலியுறுத்தி முழக்கமிட்டனா். இதையடுத்து, போராட்டத்தில் ஈடுபட்ட 300-க்கும் மேற்பட்டோரைப் போலீஸாா் கைது செய்து அழைத்துச் சென்றனா்.