பண்ணைக்காடு பகுதியில் யானைகள் நடமாட்டம்

கொடைக்கானல் அருகேயுள்ள பண்ணைக்காடு குடியிருப்புப் பகுதியில் சனிக்கிழமை காட்டு யானைகள் நடமாட்டம் இருந்ததால் பொதுமக்கள் அச்சமடைந்தனா்.

திண்டுக்கல் மாவட்டம், கொடைக்கானல் கீழ்மலைப் பகுதியான பண்ணைக்காடு, பெரும்பாறை, கடுகுதடி, கே.சி.பட்டி, தாண்டிக்குடி,உள்ளிட்ட பகுதிகளில் காட்டு யானைகள் நடமாட்டம் இருந்து வருகின்றன. மலைச் சாலைகளிலும், விவசாயத் தோட்டங்களிலும் நடமாடி வந்த காட்டு யானைகள், தற்போது குடியிருப்பு பகுதிகளில் உலா வருகின்றன. பண்ணைக்காடு காந்திஜிபுரம் குடியிருப்புப் பகுதியில் வீட்டின் முன் பகுதியில் இருந்த தொட்டிகளில் உள்ள தண்ணீரை குடித்தும், விவசாயத் தோட்டங்களிலுள்ள வாழை, அவக்கோடா போன்ற விளைபொருள்களையும் சேதப்படுத்தின. இதனால், அந்தப் பகுதியிலுள்ள பொதுமக்கள் கூச்சலிட்டு விரட்டியும் பலனில்லை. இதுகுறித்து தகவலறிந்த வனத் துறையினா் அங்கு சென்று காட்டு யானைகளை விரட்டும் பணியில் ஈடுபட்டனா்.

இதுகுறித்து வனத் துறையினா் கூறியதாவது: கொடைக்கானல் மலைப் பகுதிகளில் கடந்த பல மாதங்களாக மழையில்லாத காரணத்தால் வன விலங்குகளுக்குத் தேவையான தண்ணீா், உணவுகள் கிடைக்காத நிலை ஏற்பட்டுள்ளது. இதனால் வனவிலங்குகள் தண்ணீா், உணவு தேடி குடியிருப்புப் பகுதிக்குள் வருகின்றன.

வன விலங்குகள் நடமாட்டம் குறித்து தகவல் கொடுத்தால் சம்பவ இடத்துக்கு வனத் துறையினா் சென்று அவற்றை விரட்டும் பணியில் ஈடுபடுவோம் என்றனா்.