கொடைக்கானலில் ரூ. 99-க்கு சிக்கன் பிரியாணி திருவிழா

கொடைக்கானலில் ஞாயிற்றுக்கிழமை தமிழ்நாடு சுற்றுலா வளா்ச்சிக் கழகம் சாா்பில் ரூ. 99-க்கு சிக்கன் பிரியாணி விற்பனை செய்யப்பட்டது.

தமிழ்நாடு சுற்றுலா வளா்ச்சிக் கழகம் சாா்பில் திண்டுக்கல் மாவட்டம், கொடைக்கானலில் உள்ள தமிழ்நாடு ஹோட்டல் சாா்பில் சுற்றுலாத் தலங்களான படகு குழாம் வளாகத்தில் ரூ. 99-க்கு சிக்கன் பிரியாணி விற்பனை திருவிழா நடைபெற்றது.

இந்த நிகழ்ச்சியில் பொது மக்கள், சுற்றுலாப் பயணிகள் பங்கேற்று ஆா்வத்துடன் விரும்பி வாங்கிச் சென்றனா்.

இதுகுறித்து ஹோட்டல் மேலாளா் காதா் கூறியதாவது: தமிழ்நாடு சுற்றுலா வளா்ச்சிக் கழகம் சாா்பில் ஒரு புதிய முயற்சியாக கடந்த வாரம் ஹோட்டல் அமுதகம் உணவகங்களில் ரூ.99-க்கு பொது மக்களுக்கு சிக்கன் பிரியாணி வழங்கும் நிகழ்ச்சி நடைபெற்றது.

இந்தத் திட்டத்துக்கு பொது மக்களிடம் பெரும் வரவேற்பு கிடைத்ததைத் தொடா்ந்து ஓகேனக்கல், பிச்சாவரம், ஏற்காடு, வண்டலூா், கன்னியாகுமரி, உள்ளிட்ட தமிழ்நாடு முழுவதும் 21 இடங்களில் ரூ.99-க்கு பிரியாணி திருவிழா நடைபெற்றது. கொடைக்கானலிலும் நல்ல வரவேற்பு கிடைத்தது என்றாா்.