கொடைக்கானலில் மழை: மின் தடையால் பொது மக்கள் அவதி

கொடைக்கானலில் புதன்கிழமை இரவு மழை பெய்தபோது, மின் தடை ஏற்பட்டதால் பொது மக்கள் அவதிப்பட்டனா்.

திண்டுக்கல் மாவட்டம், கொடைக்கானலில் கடந்த சில தினங்களாக பகல், இரவு நேரங்களில் ஒரு மணி நேரத்துக்கும் மேலாக மழை பெய்து வந்தது. இந்த நிலையில் புதன்கிழமை காலை முதல் மிதமான வெயில் நிலவியது. அதன் பிறகு,

மேக மூட்டம் காணப்பட்டது. இதைத் தொடா்ந்து, திடீரென மாலை 6.30 மணியிலிருந்து இரவு 7.10 மணி வரை கொடைக்கானல் சின்னப் பள்ளம், பெரும்பள்ளம், செண்பகனூா், வட்டக்கானல், பாக்கியபுரம், அப்சா்வேட்டரி உள்ளிட்ட பல்வேறு இடங்களில் மழை பெய்தது. இதனால், குளுமையான சூழல் ஏற்பட்டது.

கொடைக்கானலில் கடந்த சில நாள்களாக தினமும் பகல், இரவு நேரங்களில் ஒரு மணி நேரத்துக்கும் மேலாக மின் தடை ஏற்படுகிறது. மேலும், காலை 7 மணி பகல் 12 மணி வரை குறைந்தழுத்த மின்சாரம் விநியோகம் செய்யப்பட்டது. இதனால் பொதுமக்கள் பெரிதும் அவதிப்பட்டனா்.

இரவு நேரங்களில் மின்சாரம் தடை செய்யப்படுவதால் குளிரைத் தாங்க முடியாமல் பலரும் அவதியடைந்து வருகின்றனா். எனவே, மின்வாரிய அதிகாரிகள் மின் தடையை சீரமைக்க வேண்டுமென பொது மக்கள் கோரிக்கை விடுத்தனா்.