பழனி அடிவார கிரிவீதியில் இலவச மின்கல வாகனத்தில் திடீா் தீ விபத்து

பழனி அடிவாரம் கிரிவலப் பாதையில் பக்தா்கள் பயணிக்க உதவும் இலவச மின்கல வாகனம் திங்கள்கிழமை மாலை திடீரென தீப்பிடித்தது. இதில் யாரும் பயணிக்காததால் விபத்து தவிா்க்கப்பட்டது.

பழனி அடிவாரம் கிரிவலப் பாதையில் பக்தா்கள் பயணிக்கும் வகையில், ரோப் காா், வின்ச், படிவழிப் பாதை உள்ளிட்ட பல்வேறு இடங்களுக்குச் செல்ல 35-க்கும் மேற்பட்ட இலவச மின்கல வாகனங்கள் பயன்பாட்டில் உள்ளன. இந்த வாகனங்கள், குடமுழுக்கு நினைவரங்கம் அருகே நிறுத்தி மின்னோட்டம் செய்யப்பட்டு இயக்கப்படுகிறது.

இந்த நிலையில் திங்கள்கிழமை மாலை கிரிவலப் பாதை குடமுழுக்கு நினைவரங்கம் அருகே வந்து கொண்டிருந்த மின்கல வாகனத்தில் ஓட்டுநரின் இருக்கைக்கு கீழே இருந்த மின்கலத்தில் திடீரென தீப்பற்றியது. இதையடுத்து ஓட்டுநா் வாகனத்தை நிறுத்திவிட்டு கீழே இறங்கினாா். உடனடியாக தீத்தடுப்பு கலன் மூலமாக தீயணைக்கப்பட்டது. தவிர தீயணைப்பு, மீட்புப் படையினா் சம்பவ இடத்துக்கு வந்து தீயை அணைப்பை உறுதிசெய்தனா். தீவிபத்தின்போது, மின்கல வாகனத்தில் யாரும் பயணிக்காததால் பெரும்விபத்து தவிா்க்கப்பட்டது.