போக்சோ வழக்கில் இளைஞருக்கு 27 ஆண்டுகள் சிறை

போக்சோ வழக்கில் வத்தலகுண்டு இளைஞருக்கு 27 ஆண்டுகள் சிறைத் தண்டனை விதித்து, திண்டுக்கல் நீதிமன்றம் வியாழக்கிழமை தீா்ப்பளித்தது.

திண்டுக்கல் மாவட்டம், வத்தலகுண்டு அடுத்த கனவாய்ப்பட்டியைச் சோ்ந்தவா் பா.புவனேஸ்வரன் (25). இவா், திருப்பூரில் தனியாா் பண்ணையில் கண்காணிப்பாளராகப் பணிபுரிந்து வருகிறாா்.

இவா் கடந்த 2020-ஆம் ஆண்டு 17 வயது சிறுமியை திருமணம் செய்ததாகக் குற்றச்சாட்டு எழுந்தது. இதன்பேரில், வத்தலகுண்டு போலீஸாா் போக்சோ சட்டத்தின் கீழ் வழக்குப் பதிவு செய்து புவனேஸ்வரனை கைது செய்தனா்.

இதுதொடா்பான வழக்கு விசாரணை திண்டுக்கல் மகளிா் விரைவு நீதிமன்றத்தில் நடைபெற்று வந்தது. விசாரணை முடிவடைந்த நிலையில், நீதிபதி (பொ) பத்மா வியாழக்கிழமை தீா்ப்பளித்தாா். இதில், புவனேஸ்வரனுக்கு 27 ஆண்டுகள் சிறைத் தண்டனையும், ரூ.15 ஆயிரம் அபராதமும் விதித்தாா்.