பிளஸ் 2 மொழிப் பாடத் தேர்வுக்கு 312 பேர் வரவில்லை

மதுரை மாவட்டத்தில் பிளஸ் 2 தமிழ் உள்ளிட்ட மொழிப் பாடங்களை 312 பேர் எழுதவரவில்லை. மேலும், தமிழ், சமஸ்கிருத பாட வினாக்கள் எளிமையாக இருந்ததாக மாணவர்கள் தெரிவித்தனர். தேர்வறைக்குள் காலணி அணிந்தும், இடுப்பு பெல்ட் அணிந்தும் செல்ல அனுமதிக்கவில்லை.

 தமிழகத்தில் பிளஸ் 2 பொதுத் தேர்வு வெள்ளிக்கிழமை தொடங்கியது. மதுரை மாவட்டத்தில் 92 மையங்களில் 38,683 மாணவ, மாணவியர் தேர்வு எழுத அனுமதிக்கப்பட்டிருந்தனர்.

  மதுரை மாவட்டத்தில் பள்ளிகள் மூலம் தேர்வெழுதியவர்களில் 238 பேர் தேர்வெழுத வரவில்லை. தனித் தேர்வர்களில் 69 பேரும், தட்கல் முறையில் விண்ணப்பித்தவர்களில் 5 பேரும் தேர்வெழுதவில்லை. மதுரை மாவட்டத்தில் தமிழ், சமஸ்கிருதம், ஹிந்தி மற்றும் பிரஞ்சு என அனைத்து மொழிப் பாடங்களிலும் 312 பேர் தேர்வு எழுத  வரவில்லை என மாவட்ட கல்வி அலுவலர்கள் தெரிவித்தனர்.

  ஆட்சியர் கண்காணிப்பு: நிர்மலா பெண்கள் மேல்நிலைப்பள்ளி, தியாகராஜர் மாதிரி மேல்நிலைப் பள்ளி மற்றும் யா.ஒத்தக்கடை அரசு பெண்கள் மேல்நிலைப் பள்ளிகளில் தேர்வு அறைகளை மாவட்ட ஆட்சியர் வீரராகவராவ் மற்றும் முதன்மைக் கல்வி அலுவலர் ஜோ.ஆஞ்சலோஇருதயசாமி ஆகியோர் பார்வையிட்டனர்.