லட்சுமிசுந்தரம் ஹாலில் நாளை முதல் மகான்களின் முகாம் தமிழ் நாடக விழா

மதுரை லட்சுமிசுந்தரம் ஹாலில் வெள்ளிக்கிழமை முதல் (ஆக.31) மகான்களின் முகாம் தமிழ் நாடகவிழா நிகழ்ச்சி நடைபெறுகிறது.
 இதுகுறித்து ஸ்ரீ சத்குரு சங்கீதசமாஜம் கெளரவச் செயலர் எஸ்.வெங்கடநாராயணன் விடுத்துள்ள செய்திக்குறிப்பு: மதுரை ஸ்ரீ சத்குரு சங்கீத சமாஜம் மற்றும் மகாலட்சுமி பெண்கள் நாடகக்குழு டிரஸ்டும், பாம்பே ஞானம் குழுவினரும் இணைந்து மகான்களின் முகாம் தமிழ் நாடக விழாவை நடத்தவுள்ளனர்.
 நாடக விழாவின் முதல் நிகழ்ச்சியாக வெள்ளிக்கிழமை (ஆக.31) மாலை 6.30 மணிக்கு ஆதி சங்கரர் அருளிய பஜகோவிந்தம் நாடகம் நடைபெறுகிறது. பஜகோவிந்தம் என்பது சமஸ்கிருத மொழியில் ஆதிசங்கரரால் இயற்றப்பட்ட எட்டாம் நூற்றாண்டு பக்திப் பாடலாகும். பாம்பே ஞானம் இயக்கத்தில் அவரது மகாலட்சுமி பெண்கள் நாடகக் குழுவினர் பஜகோவிந்தம் நாடகத்தை வழங்குகிறார்கள். 
 சனிக்கிழமை (செப்.1) அன்று மாலையில் 12 ஆம் நூற்றாண்டில் வாழ்ந்த சமஸ்கிருத பண்டிதர் பக்த ஜெயதேவரின் 24 அஷ்டபதிகளை மையமாக வைத்து பக்தஜெபதேவர் நாடகம் நடத்தப்படுகிறது. ஜெயதேவர் வாழ்க்கை தொகுப்பாகவே நாடகக் காட்சிகள் அமைக்கப்பட்டுள்ளன.
  வரும் செப்டம்பர் 2 ஆம் தேதி ஞாயிற்றுக்கிழமை மாலையில் பகவான் ஸ்ரீ ரமணரின் உபதேசங்களை மையமாக வைத்து பகவான் ஸ்ரீ ரமணர் நாடகம் நடத்தப்படுகிறது எனக்குறிப்பிடப்பட்டுள்ளது.