தூத்துக்குடி சம்பவத்துக்கு எதிராக  8 மனுக்கள் தாக்கல்

தூத்துக்குடி துப்பாக்கிச்சூடு தொடர்பாக சிபிஐ விசாரணை, உயிரிழந்தவர்களுக்கு இழப்பீடு வழங்குதல், மாவட்ட ஆட்சியர் உள்ளிட்டோர் மீது வழக்குப் பதிவு செய்யக் கோருதல், இணையதள சேவை முடக்கத்தை ரத்து செய்யக் கோருதல் உள்ளிட்ட கோரிக்கைகளுடன் வழக்குரைஞர்கள், சமூக ஆர்வலர்கள் 8 பேர் தாக்கல் செய்த மனுக்கள் மீதான விசாரணை சென்னை உயர்நீதிமன்ற மதுரைக்கிளையில் வெள்ளிக்கிழமை நடைபெறுகிறது.
தூத்துக்குடி ஸ்டெர்லைட் ஆலைக்கு எதிரான போராட்டத்தில் போலீஸார் நடத்திய துப்பாக்கிச்சூடு தொடர்பாக சென்னை உயர்நீதிமன்ற மதுரைக்கிளையில் வழக்குரைஞர்கள் முத்துக்குமார், ரஜினி, மதுரையைச் சேர்ந்த சையது அப்துல் கதிர், ஒத்தக்கடையைச் சேர்ந்த எழிலரசு, கோவில்பட்டியைச் சேர்ந்த அழகர்சாமி, சமூக ஆர்வலர் கே.கே.ரமேஷ், மதுரை பி.பி.குளத்தைச் சேர்ந்த கதிரேசன், ராஜ்குமார் ஆகியோர் மதுரை உயர்நீதிமன்ற மதுரைக் கிளையில் தனித்தனியாக மனுக்கள் தாக்கல் செய்துள்ளனர். அதில், தூத்துக்குடி, நெல்லை மற்றும் கன்னியாகுமரி மாவட்டங்களில் கலவரங்களை கட்டுப்படுத்துவதாகக் கூறி இணையதள சேவையை முடக்கியுள்ளனர். இதனால் பொறியியல் மற்றும் பிறகல்லூரிகளுக்கு விண்ணப்பிக்க முடியாமல் மாணவர்கள் பாதிக்கப்பட்டுள்ளனர்.
துப்பாக்கிச்சூடு நடத்த உத்தரவிட்ட தூத்துக்குடி மாவட்ட ஆட்சியர், காவல்துறை டிஐஜி, எஸ்.பி. ஆகியோர் மீது வழக்குப்பதிவு செய்து பணியில் இருந்து விடுவித்து, தற்போது பதவியில் உள்ள உயர்நீதிமன்ற நீதிபதி தலைமையில் நீதிவிசாரணை நடத்த உத்தரவிட வேண்டும்.
மேலும் இச்சம்பவத்தை கொலை வழக்காக பதிவு செய்து விசாரிக்க உத்தரவிட வேண்டும். துப்பாக்கிச்சூட்டில் உயிரிழந்தவர்களுக்கு தலா ரூ.25 லட்சம் இழப்பீடு வழங்க வேண்டும் மற்றும் சிபிஐ விசாரணைக்கு உத்தரவிட வேண்டும் என குறிப்பிட்டுள்ளனர். இந்த மனுக்கள் வெள்ளிக்கிழமை (மே 25) விசாரணைக்கு வரவுள்ளன.