வஉசி சிலைக்கு அரசியல் கட்சியினர் மாலை அணிவித்து மரியாதை

சுதந்திரப் போராட்ட வீரர் வ.உ.சிதம்பரனாரின் பிறந்தநாளையொட்டி மதுரை சிம்மக்கல்லில் உள்ள அவரது சிலைக்கு அரசியல் கட்சியினர் புதன்கிழமை மாலை அணிவித்து மரியாதை செலுத்தினர்.
அதிமுக சார்பில் கட்சியின் மாநகர் மாவட்டச் செயலரும்,  கூட்டுறவுத் துறை அமைச்சருமான செல்லூர் கே.ராஜூ, வஉசி சிலைக்கு மாலை அணிவித்து மரியாதை செலுத்தினார். நிர்வாகிகள் முன்னாள் துணை மேயர் கு.திரவியம், எம்.எஸ்.பாண்டியன் உள்ளிட்ட பலர் கலந்து கொண்டனர்.
திமுக சார்பில் மாநகரப் பொறுப்புக்குழுத் தலைவர் கோ.தளபதி தலைமையில் பொறுப்புக்குழு உறுப்பினர் பெ.குழந்தைவேல் மற்றும் கட்சியினர் மாலை அணிவித்தனர்.  பாஜக சார்பில் மாநகர் மாவட்டத் தலைவர் சசிராமன் தலைமையில், மாநிலத் துணைத் தலைவர் சுரேந்திரன் உள்ளிட்ட பலர் மாலை அணிவித்து மரியாதை செலுத்தினர். காங்கிரஸ் சார்பில் அகில இந்திய காங்கிரஸ் கட்சி உறுப்பினர் முருகேசன் தலைமையில் அக்கட்சியினர் மரியாதை செலுத்தினர்.
 அம்மா மக்கள் முன்னேற்றக் கழகம் சார்பில் கொள்கை பரப்புச் செயலர் தங்க தமிழ்ச் செல்வன் தலைமையில் நிர்வாகிகள் ஜெயபால், பரமநாதன் உள்ளிட்டோர் மாலை அணிவித்து மரியாதை செலுத்தினர்.
மதச்சார்பற்ற ஜனதாளம் கட்சியின் மாநிலப் பொதுச் செயலர் க.ஜான்மோசஸ், மாநிலச் செயலர் எஸ்.எம்.செல்லப்பாண்டி, மாநிலப் பொதுக்குழு உறுப்பினர் எஸ்.வேலுச்சாமி,  புறநகர் மாவட்டத் தலைவர் கே.பாக்கியத்தேவர் ஆகியோர் மாலை அணிவித்தனர். முன்னதாக, அனைவருக்கும் இனிப்புகள் வழங்கப்பட்டன.
 தமிழர் தேசிய முன்னணி மதுரை மாநகர் மாவட்டத் தலைவர் வெ.ந.கணேசன், மாவட்டப் பொருளாளர் சீ.வீராச்சாமி, நிர்வாகிகள் ச.ராமச்சந்திரன், தி.முருகன் உள்ளிட்ட பலர் மாலை அணிவித்து மரியாதை செலுத்தினர்.