ரயிலில் அடிபட்டு இறந்தவரின் சடலத்தை பெற வந்த மனைவியும் விபத்தில் சாவு

மதுரை அருகே ரயிலில் அடிபட்டு உயிரிழந்த வடமாநிலத்தவரின் சடலத்தைப் பெற வந்த அவரது மனைவியும் விபத்தில் உயிரிழந்தார்.
  இதுகுறித்து மதுரை ரயில்வே போலீஸார் கூறியதாவது: 
கடந்த 6 ஆம் தேதி வாடிப்பட்டி பகுதியில் ரயில் மோதிய விபத்தில் ஒருவர் உயிரிழந்தார். விசாரணையில் அவரது பெயர் முண்டா (38) என்பதும் ஜார்கண்ட் மாநிலம் ராஞ்சியைச் சேர்ந்தவர் என்பதும் தெரியவந்தது. அதையடுத்து, முண்டாவின் சடலம், மதுரை அரசு மருத்துவமனையில் வைக்கப்பட்டிருந்தது. இதுகுறித்து  அவரது குடும்பத்தினருக்குத் தகவல் தெரிவிக்கப்பட்டது.
முண்டாவின் சடலத்தைப் பெற ராஞ்சியிலிருந்து அவரது மனைவி, மகன் புறப்பட்ட நிலையில், அவர்களும் விபத்தில் சிக்கியுள்ளனர். அதில் முண்டாவின் மனைவி உயிரிழந்ததாகக் கூறப்படுகிறது. மகன் பலத்த காயமடைந்து சிகிச்சையில் உள்ளார். இதனால், முண்டாவின் சடலத்தை தொடர்ந்து பாதுகாக்க முடியாத நிலை ஏற்பட்டது. அதையடுத்து தூத்துக்குடியைச் சேர்ந்த பாலசுப்பிரமணி என்பவரிடம் முண்டாவின் சடலம் புதன்கிழமை ஒப்படைக்கப்பட்டது என்றனர்.