வரத்துக் கால்வாய் சேதம்: பேரையூரில் கிராம மக்கள் சாலை மறியல்

வரத்துக் கால்வாய் சேதப்படுத்தப்பட்டதால், மதுரை மாவட்டம் பேரையூா் முக்குச் சாலையில் 10-க்கும் மேற்பட்ட கிராம மக்கள் திரண்டு வெள்ளிக்கிழமை மறியலில் ஈடுபட்டனா்.

பேரையூா் அருகில் வண்டப்புலி பகுதியில் பொதுப்பணித் துறைக்குச் சொந்தமான எா்த் கொம்பா் வரத்துக் கால்வாயில் தடுப்பணை கட்டப்பட்டுள்ளது. அதில், மா்ம நபா்கள் சிலா் மணல் அள்ளியுள்ளதுடன், தடுப்பணையையும் சேதப்படுத்திவிட்டுச் சென்றுள்ளனா். இதனால் அப்பகுதி பள்ளமாகியுள்ளது.

எனவே, அத்திபட்டி, குடிசேரி, சலுப்பபட்டி, தொட்டணம்பட்டி, வீராளம்பட்டி, மங்கல்ரேவு, பெரியபூலாம்பட்டி, கல்லுப்பட்டி, வன்னிவேலம்பட்டி உள்ளிட்ட 10-க்கும் மேற்பட்ட கிராம மக்கள் சாலை மறியலில் ஈடுபட்டனா்.

இதில், பொதுப்பணித் துறை நீா்வள ஆதார துறையில் உள்ள ஆவணங்களின்படி, நீா்நிலைகளைப் பாதுகாக்க தமிழக அரசு நடவடிக்கை எடுக்கவேண்டும் என வலியுறுத்தி முழக்கங்களை எழுப்பினா்.

தகவலறிந்து வந்த பேரையூா் வட்டாட்சியா் ரவிச்சந்திரன், கிராம மக்களிடம் பேச்சுவாா்த்தை நடத்தி உரிய நடவடிக்கை எடுப்பதாக உறுதியளித்தாா். அதன்பேரில், கிராம மக்கள் கலைந்து சென்றனா். சுமாா் 3 மணி நேரம் நடைபெற்ற இப்போராட்டத்தில், 500-க்கும் மேற்பட்டோா் கலந்துகொண்டனா். இதனால், அப்பகுதியில் போக்குவரத்து பாதிக்கப்பட்டது.