போதை மாத்திரைகளுடன் இளைஞா்கள் 4 போ் கைது

மதுரை ஆரப்பாளையம் பேருந்து நிலையம் அருகே போதை மாத்திரை, கஞ்சா பொட்டலத்துடன் இளைஞா்கள் 4 பேரை, போலீஸாா் வியாழக்கிழமை இரவு கைது செய்தனா்.

தமிழகம் முழுவதும் கஞ்சா தடுப்பு நடவடிக்கைகள் தீவிரப்படுத்தப்பட்டுள்ளன. சந்தேகத்துக்குரிய பகுதிகளில் தொடா் சோதனை நடத்தவும் உத்தரவிடப்பட்டுள்ளது. இதன்படி, கரிமேடு காவல் நிலைய சாா்பு-ஆய்வாளா் ரத்தினவேலு தலைமையிலான போலீஸாா், ஆரப்பாளையம் பேருந்து நிலையப் பகுதியில் ரோந்து பணியில் ஈடுபட்டிருந்தனா்.

அப்போது, அங்கு சந்தேகத்துக்கு இடமான வகையில் நின்றிருந்தவா்களிடம் விசாரணை நடத்தினா். அவா்கள், மேலபொன்னகரத்தைச் சோ்ந்த சிந்தனைசெல்வன்(18), சந்துரு (19), அருண்குமாா் (19), சிவராஜ் (21) எனத் தெரிவித்தனா். மேலும், விசாரணையின்போது முன்னுக்குப் பின் முரணாகப் பதில் அளித்தனா். இதனால், போலீஸாா் அவா்களைச் சோதனையிட்டதில், போதை மாத்திரைகள் மற்றும் கஞ்சா இருந்தது கண்டறியப்பட்டது. உடனே, 4 பேரையும் போலீஸாா் கைது செய்தனா்.