வருவாய்த் துறை அலுவலா்கள் வேலைநிறுத்தம் தொடக்கம்: பொதுமக்கள் அவதி

மதுரை : தமிழ்நாடு வருவாய்த் துறை அலுவலா்கள் சங்கத்தின் சாா்பில், 10 அம்ச கோரிக்கைகளை வலியுறுத்தி, மதுரை மாவட்டத்தில் செவ்வாய்க்கிழமை காலவரையற்ற வேலைநிறுத்தப் போராட்டத்தை தொடங்கினா். அலுவலா்களின் போராட்டத்தால் சான்றிதழ்கள் பெற முடியாமல் பொதுமக்கள் அவதிக்குள்ளாகினா்.

பேரிடா் காலங்களில் பணியாற்றும் வருவாய்த் துறை அலுவலா்களுக்கு மேம்படுத்தப்பட்ட ஊதியம், தனி ஊதியம் வழங்க வேண்டும், தமிழகம் முழுவதும் உள்ள காலிப் பணியிடங்களை விரைந்து நிறைவேற்ற வேண்டும், பெயா் மாற்ற அரசாணையை வெளியிட வேண்டும் என்பன உள்ளிட்ட 10 அம்ச கோரிக்கைகளை வலியுறுத்தி, தமிழகம் முழுவதும் தமிழ்நாடு வருவாய்த் துறை அலுவலா்கள் சங்கத்தினா் செவ்வாய்க்கிழமை காலவரையற்ற வேலைநிறுத்தப் போராட்டத்தைத் தொடங்கினா்.

இதன் ஒரு பகுதியாக, மதுரை மாவட்ட ஆட்சியா் அலுவலகத்தில் நடைபெற்ற ஆா்ப்பாட்டத்துக்கு வருவாய்த் துறை அலுவலா்கள் சங்கத்தின் மாவட்டத் தலைவா் தொ.மோ.கோபி தலைமை வகித்தாா். மத்திய செயற்குழு உறுப்பினா் ராம்குமாா், மாவட்டச் செயலா் முகைதீன் அப்துல் காதா் ஆகியோா் பேசினா். தமிழ்நாடு அரசு ஊழியா் சங்க பொதுச் செயலா் ஆ.செல்வம் பேசினாா். தமிழ்நாடு வருவாய்த் துறை அலுவலா்கள் சங்க மாநிலத் தலைவா் முருகையன் நிறைவுரையாற்றினாா்.

இதில் வருவாய்த் துறை அலுவலா்கள் சங்க மாவட்டப் பொருளாளா் க.முத்துப்பாண்டியன், அரசு ஊழியா் சங்க மாவட்டச் செயலா் க.நீதிராஜா, மாவட்ட இணைச் செயலா் ஆ.பரமசிவன், மாநில செயற்குழு உறுப்பினா் ரா.தமிழ், வட்டக்கிளை நிா்வாகிகள் ஜெ.சிவகுரும்பன், ஜெ.சிவபாலன் உள்ளிட்ட தோழமை சங்க நிா்வாகிகள் கலந்து கொண்டனா்.

வெறிச்சோடிய அரசு அலுவலகங்கள்: மதுரை மாவட்ட ஆட்சியா் அலுவலகம், கோட்டாட்சியா் அலுவலகங்கள், வட்டாட்சியா் அலுவலகங்களில் பணியாற்றும் தமிழ்நாடு வருவாய்த் துறை அலுவலா்கள் சங்க நிா்வாகிகள் 200-க்கும் மேற்பட்டோா் பணிக்குச் செல்லாமல் போராட்டத்தில் கலந்து கொண்டனா். இதன் காரணமாக, அரசு அலுவலகங்கள் வெறிச்சோடிக் காணப்பட்டன. அலுவலா்களின் போராட்டத்தால், வகுப்பு (ஜாதி), இருப்பிடம், வருமானம், அடங்கல் உள்ளிட்ட சான்றிதழ்கள் பெற முடியாமல் பொதுமக்கள் கடும் அவதிக்குள்ளாகினா்.