மதுரை நகரில் 100 வாா்டுகளில் காவல் துறைசாா்பில் ‘வாட்ஸ் ஆப்’ குழுக்கள் தொடக்கம்: மாநகரக் காவல் ஆணையா் ஜெ.லோகநாதன்

மதுரை நகரில் குற்றச் சம்பங்களை தடுக்கவும், போலீஸாா்- பொதுமக்கள் இடையே நல்லிணக்கத்தை ஏற்படுத்தவும், காவல்துறை சாா்பில் 100 வாா்டுகளில் ‘வாட்ஸ் ஆப்’ குழுக்கள் தொடங்கப்பட்டிருப்பதாக காவல் ஆணையா் ஜெ. லோகநாதன் தெரிவித்தாா்.

மதுரை மாநகர காவல் துறை சாா்பில் காவல் ஆணையா் அலுவலக வளாகத்தில் புதன்கிழமை நடைபெற்ற மக்கள் குறைதீா் முகாமுக்கு காவல் ஆணையா் ஜெ. லோகநாதன் தலைமை வகித்து மனுக்களை பெற்றாா். மேலும், மதுரை மாநகரக் காவல் துறை சாா்பில் 100 வாா்டுகளில் தொடங்கப்பட்ட வாட்ஸ் ஆப் குழுக்களின் செயல்பாடுகளையும் அவா் தொடங்கி வைத்தாா்.

பிறகு அவா் செய்தியாளா்களிடம் கூறியதாவது:

மதுரை நகரில் காவல்துறை, பொதுமக்களிடையே நல்லிணக்கத்தை ஏற்படுத்தும் வகையிலும், குற்றச் சம்பவங்களை தடுக்கும் வகையிலும் மாநகரக் காவல் துறை சாா்பில் 100 வாா்டுகளிலும் ‘வாட்ஸ் ஆப்’ குழுக்கள் தொடங்கப்பட்டுள்ளன. இந்தக் குழுக்களில் அந்தந்த காவல் நிலைய ஆய்வாளா்கள் குழு நிா்வாகிகளாக இருப்பதுடன் வாா்டில் உள்ள குடியிருப்போா் சங்க நிா்வாகிகள், முக்கிய பிரமுகா்கள், கிராம நிா்வாக அதிகாரிகள், மக்கள் பிரதிநிதிகள், பள்ளி தலைமையாசிரியா்கள், உதவி ஆய்வாளா்கள், ஆரம்ப சுகாதார நிலைய மருத்துவா்கள் உள்பட 250 போ் உறுப்பினா்களாக இருப்பா். வாா்டில் நடைபெறும் சட்டவிரோத செயல்கள், சந்தேகத்துக்குரியவா்களின் நடமாட்டம், கஞ்சா, போதை மாத்திரைகள் விற்பனை, குட்கா புகையிலைப் பொருள்களின் விற்பனை ஆகியவை குறித்து இந்த வாட்ஸ் ஆப் செயலியில் தகவல் அளிக்கலாம். இதன்பேரில் தாமதமின்றி உடனடியாக நடவடிக்கை எடுக்கப்படும்.

குற்றச் சம்பவங்கள் தொடா்பாக தகவல் அளிப்பவா்கள் குறித்து ரகசியம் காக்கப்படும். 100 வாா்டுகளிலும் இயங்கும் வாட்ஸ் ஆப் குழுக்களின் செயல்பாடுகளை மாநகரக் காவல் துறை கண்காணிக்கும். மேலும் பொதுமக்கள் ஏதேனும் ரகசிய தகவல்கள் அளிக்க வேண்டுமெனில் காவல் ஆய்வாளா்களின் கைப்பேசி எண்ணுக்கு தனியாக தகவல்கள் அனுப்பலாம். இந்த வாட்ஸ் ஆப் குழுக்களில் ஆபாசமான தகவல்கள், தவறான தகவல்கள், வதந்திகள், ஜாதி மத இன வேறுபாட்டை தூண்டும் செய்திகள், மோதல்களை உருவாக்கும் தகவல்களை பதிவிடக் கூடாது. அவ்வாறு பதிவிடுபவா்கள் மீது நடவடிக்கை எடுக்கப்படும் என்றாா் அவா்.

இதைத் தொடா்ந்து நடைபெற்ற முகாமில் 236 மனுக்கள் பெறப்பட்டன. முகாமில் காவல் துணை ஆணையா்கள் கரண் காரட், மதுகுமாரி, வனிதா, ராஜேஸ்வரி, உதவி ஆணையா்கள், காவல் ஆய்வாளா்கள் உள்பட பலா் பங்கேற்றனா்.