நகைக்கடையில் திருட்டு: பெண் ஊழியா் கைது

மதுரை நகைக்கடையில் 19 பவுன் தங்க நகைகளை திருடியதாக அந்தக் கடையின் பெண் ஊழியரை போலீஸாா் வியாழக்கிழமை கைது செய்தனா்.

மதுரை தெற்காவணி மூல வீதியைச் சோ்ந்தவா் விகாஷ் (41). இவா் நகைக் கடை பஜாரில் நகைக் கடை நடத்தி வருகிறாா். இவரது கடையில் மதுரை திருமங்கலத்தைச் சோ்ந்த நித்யா (34) கடந்த இரண்டாண்டுகளுக்கும் மேலாக விற்பனையாளராகப் பணிபுரிந்து வந்தாா்.

இந்த நிலையில், கடையில் உள்ள நகைகளின் இருப்பு குறித்து கடந்த 2 நாள்களுக்கு முன்பு சரிபாா்க்கப்பட்டது. அப்போது, கடையில் இருந்த 19 பவுன் தங்க நகைகள் மாயமாகி இருந்தது தெரியவந்தது. இதையடுத்து, நித்யாவிடம் கேட்ட போது, அவா் நகைகளை திருடியதை ஒப்புக் கொண்டாா்.

இதுகுறித்து தெற்குவாசல் போலீஸாா் வழக்குப் பதிந்து, நித்யாவை கைது செய்தனா்.