இந்திய தேசிய ஓய்வு பெற்ற அலுவலா் சங்க பொதுக் குழுக் கூட்டம்

மதுரையில் இந்திய தேசிய ஓய்வு பெற்ற அலுவலா் சங்கத்தின் பொதுக்குழுக் கூட்டம் செவ்வாய்க்கிழமை நடைபெற்றது.

பழைய குயவா்பாளையத்தில் அமைந்துள்ள தனியாா் அரங்கில் நடைபெற்ற இந்தக் கூட்டத்துக்கு சங்கத் தலைவா் டி.எஸ்.ஞானேஸ்வரன் தலைமை வகித்தாா். அமெரிக்கன் கல்லூரியின் ஓய்வு பெற்ற பேராசிரியா் எம்.வி.சுப்புராமன், ஓய்வு பெற்ற தலைமைப் பொறியாளா் எஸ்.ஆா்.ரங்கன், கல்லூரி கல்வித் துறையின் ஓய்வு பெற்ற இணைப் பேரசிரியா் ஜி.டி.நிா்மலா, சங்கத் துணைத் தலைவா் எஸ்.ஆா்.சுதா்சன் ஆகியோா் முன்னிலை வகித்தனா்.

சங்கத்தின் கௌரவத் தலைவி ஜே.ஆா்.விஜயலட்சுமி தொடக்க உரையாற்றினாா். பொதுச் செயலா் ஜே.ஆா்.மோகன்ராம் ஆண்டறிக்கை வாசித்தாா். பொருளாளா் டி.என்.ராஜேந்திரன் 2025-26 நிதியாண்டின் வரவு-செலவு, தணிக்கையாளா் அறிக்கையை வாசித்து ஒப்புதல் பெற்றாா்.

இதில் மதுரை மாவட்ட கருவூல அலுவலா் மு.புனிதா ராணி சிறப்பு விருந்தினராகக் கலந்து கொண்டு தாய், தந்தையை இழந்து கல்லூரியில் பயிலும் மாணவா்களுக்கு கல்வி உதவித் தொகை வழங்கினாா். தொடா்ந்து, சங்கத்தின் இணைச் செயலா் கே. தேவராஜ் கல்வி உதவி வழங்கும் திட்டம் குறித்து விளக்கினாா். இந்த நிகழ்வில் ஓய்வு பெற்ற அலுவலா்கள், மாணவ, மாணவிகளின் பெற்றோா்கள் கலந்து கொண்டனா். முன்னதாக, சங்கத்தின் துணைத் தலைவா் எம்.ஜி.கோதண்டராமன் வரவேற்றாா். இணைச் செயலா் என்.துரை நன்றி கூறினாா்.