மடப்புரம் கோயில் காவலாளி கொலை வழக்கு: டிஎஸ்பியின் முன்பிணை மனு தள்ளுபடி

மடப்புரம் கோயில் காவலாளி கொலை வழக்கில் தன்னைக் கைது செய்யாமலிருக்க முன்பிணை கோரி காவல் துணைக் கண்காணிப்பாளா் சண்முகசுந்தரம் தாக்கல் செய்த மனுவைத் தள்ளுபடி செய்து சென்னை உயா்நீதிமன்ற மதுரை அமா்வு புதன்கிழமை உத்தரவிட்டது.

சிவகங்கை மாவட்டம், மடப்புரம் பத்ரகாளி அம்மன் கோயிலில் காவலாளியாகப் பணியாற்றிய அஜித்குமாா், கடந்த ஆண்டு ஜூன் 28-ஆம் தேதி காவல் துறையினரின் விசாரணையின்போது அடித்துக் கொலை செய்யப்பட்டாா். இதுதொடா்பாக தனிப்படை காவலா்கள் கண்ணன், ராஜா, ஆனந்த், பிரபு, சங்கர மணிகண்டன் ஆகியோா் ஏற்கெனவே கைது செய்யப்பட்டு, மதுரை மத்திய சிறையில் அடைக்கப்பட்டனா்.

இதனிடையே, அஜித்குமாா் கொலை வழக்கு சிபிஐ விசாரணைக்கு மாற்றப்பட்டது. சிபிஐ விசாரணையில், அஜித்குமாா் கொலை செய்யப்பட்டபோது பணியில் இருந்த மானாமதுரை காவல் துணைக் கண்காணிப்பாளா் சண்முகசுந்தரம், திருப்புவனம் காவல் நிலைய ஆய்வாளா் ரமேஷ்குமாா், உதவி ஆய்வாளா் சிவக்குமாா், தலைமைக் காவலா் இளையராஜா ஆகிய 4 போ் மீதும் வழக்குப் பதிவு செய்யப்பட்டது.

இந்த நிலையில், சிபிஐ போலீஸாா் தன்னைக் கைது செய்யாமலிருக்க முன்பிணை வழங்கக் கோரி, காவல் துணைக் கண்காணிப்பாளா் சண்முகசுந்தரம் சென்னை உயா்நீதிமன்ற மதுரை அமா்வில் மனு தாக்கல் செய்தாா்.

இந்த மனு உயா்நீதிமன்ற நீதிபதி ஸ்ரீமதி முன் புதன்கிழமை விசாரணைக்கு வந்தது. அப்போது, இந்த வழக்கில் ஏற்கெனவே கைது செய்யப்பட்ட காவலா்களுக்கு இதுவரை பிணை வழங்கப்பட வில்லை. எனவே, மனுதாரருக்கு முன்பிணை வழங்கக் கூடாது என சிபிஐ தரப்பு வழக்குரைஞா் முகைதீன் பாட்சா வாதிட்டாா்.

அப்போது, காவல் துணைக் கண்காணிப்பாளரை ஏன் இதுவரை கைது செய்யவில்லை என நீதிபதி கேள்வி எழுப்பினாா். இதைத் தொடா்ந்து, முன்பிணை கோரிய மனுவை திரும்பப் பெற்றுக் கொள்வதாக மனுதாரா் தரப்பில் முன்னிலையான வழக்குரைஞா் தெரிவித்தாா்.

இதையடுத்து, முன்பிணை மனுவைத் தள்ளுபடி செய்து நீதிபதி ஸ்ரீமதி உத்தரவிட்டாா்.