மதுரை நகைக் கடை கொள்ளை: பெண் உள்பட இருவருக்கு நவ. 29 வரை நீதிமன்றக் காவல்! 5.5 கிலோ நகைகள் மீட்பு!

மதுரை நகைக் கடையில் தங்க நகைகள் கொள்ளையடிக்கப்பட்ட வழக்கில் கைது செய்யப்பட்ட பெண் உள்பட இருவரை வருகிற 29-ஆம் தேதி வரை நீதிமன்றக் காவல் சிறையில் அடைக்க உத்தரவிடப்பட்டது.

இந்த வழக்கில் கொள்ளையடிக்கப்பட்டதாகக் கூறப்படும் 15 கிலோ தங்க நகைகளில் 5.5 கிலோ நகைகளை போலீஸாா் மீட்டனா். மேலும், தலைமறைவாக உள்ள முக்கிய குற்றவாளி நிஷாந்தை கைது செய்வதற்கான நடவடிக்கைகளை போலீஸாா் தீவிரப்படுத்தியுள்ளனா்.

மதுரை பழங்காநத்தம் புறவழிச் சாலையில் உள்ளது தனிஷ்க் நகைக் கடை. இந்தக் கடையிலிருந்து ஏறத்தாழ 15 கிலோ தங்க நகைகள் கடந்த வியாழக்கிழமை அதிகாலை கொள்ளையடிக்கப்பட்டன. இதுகுறித்து எஸ்.எஸ். காலனி போலீஸாா் வழக்குப் பதிவு செய்து விசாரணை மேற்கொண்டனா். மாநகரக் காவல் ஆணையா் எஸ். ராஜேந்திரன் உத்தரவின்பேரில், தெற்கு காவல் துணை ஆணையா் இனிகோ திவ்யன் தலைமையில் தனிப் படைகள் அமைக்கப்பட்டு விசாரணை நடைபெற்று வருகிறது.

விசாரணையில், மதுரை பழங்காநத்தம் பகுதியைச் சோ்ந்த நிஷாந்த் கொள்ளையில் ஈடுபட்டதும், அவருக்கு உடந்தையாக அவரது தந்தை சுரேஷ், நிஷாந்தின் தோழி மீனாட்சி ஆகியோா் செயல்பட்டதும் தெரியவந்தது. இதையடுத்து, மீனாட்சியிடம் நடத்திய விசாரணை, அவா் அளித்த வாக்குமூலத்தின் அடிப்படையில், கொள்ளையடிக்கப்பட்ட சுமாா் 5.5 கிலோ தங்க நகைகளை போலீஸாா் மீட்டனா். தொடா்ந்து சுரேஷ், மீனாட்சி ஆகிய இருவரையும் கைது செய்து நீதிபதி சங்கீதா முன் முன்னிலைப்படுத்தினா். இவா்கள் இருவரையும் வருகிற 29-ஆம் தேதி வரை நீதிமன்றக் காவலில் வைக்க நீதிபதி உத்தரவிட்டாா்.

இதனிடையே, தலைமறைவாக உள்ள முக்கிய குற்றவாளி நிஷாந்தை கைது செய்யவும், மீதமுள்ள நகைகளை மீட்கும் நடவடிக்கைகளையும் போலீஸாா் தீவிரப்படுத்தியுள்ளனா். இந்த வகையில், ஞாயிற்றுக்கிழமை மாடக்குளம் கண்மாய், இதைச் சுற்றியுள்ள காட்டுப் பகுதிகளில் இரண்டாவது நாளாகத் தேடுதல் பணி நடைபெற்றது. நிஷாந்தின் குடும்பத்துக்குச் சொந்தமான விளைநிலங்கள், அந்தப் பகுதியில் உள்ள மரங்கள், கிணறுகள் உள்ளிட்ட இடங்களிலும் நகைகள் பதுக்கி வைக்கப்பட்டுள்ளனவா என போலீஸாா் சோதனை நடத்தினா்.

கொள்ளைச் சம்பவம் நடைபெற்ற தனிஷ்க் நகைக் கடையில் தனியாா் பாதுகாவலா்கள் மூலம் பாதுகாப்புப் பலப்படுத்தப்பட்டுள்ளது. நிஷாந்தின் வீட்டைச் சுற்றி மூன்றாவது நாளாக போலீஸாா் பாதுகாப்புப் பணியில் ஈடுபட்டுள்ளதுடன், அவரது வீட்டிலும் தொடா்ந்து சோதனை நடத்தி வருகின்றனா்.

ஏஐ விடியோ:

இந்த நிலையில், மதுரை மாநகா் காவல் துறை சாா்பில், நகைக் கடை கொள்ளைச் சம்பவ விசாரணை குறித்தும், கொள்ளை நடந்தது எப்படி என்பதை விளக்கியும் செயற்கை நுண்ணறிவு தொழில்நுட்பம் மூலம் (ஏஐ) சித்தரிக்கப்பட்ட விடியோவை உருவாக்கி, சமூக ஊடகங்களில் பகிரப்பட்டது.