விசாரணைக்கு அழைத்துச் செல்லப்படுபவா்களின் பாதுகாப்பை காவல் துறையினா் உறுதிப்படுத்த வேண்டும்! - அமைச்சா் வன்னி அரசு

விசாரணைக்கு அழைத்துச் செல்லப்படுபவா்களின் பாதுகாப்பை காவல் துறையினா் உறுதிப்படுத்த வேண்டும் என மாநில சமூக நீதித் துறை அமைச்சா் வன்னி அரசு தெரிவித்தாா்.

மதுரை மாவட்டம், மேலூரில் தவெக சாா்பில் குழந்தைகள் தினத்தையொட்டி, இலவச பொது மருத்துவ முகாம் ஞாயிற்றுக்கிழமை நடைபெற்றது.

இந்த முகாமை தொடங்கிவைத்த பின்னா், அமைச்சா் வன்னி அரசு செய்தியாளா்களிடம் கூறியதாவது:

கா்நாடக அரசு மேக்கேதாட்டு அணை கட்டுவது உச்சநீதிமன்றத் தீா்ப்புக்கு எதிரானது. தமிழக அரசு இதற்கு தொடா்ந்து தனது எதிா்ப்பைத் தெரிவித்து வருகிறது. நூலகம் சாா்ந்த விவகாரங்களில் வெளிப்படைத்தன்மை இருக்க வேண்டும். மாநிலங்களின் உரிமைகளை மீட்டெடுக்கும் அரசாக தவெக விளங்குகிறது. எனவே, எந்தவொரு நம்பிக்கையில்லாத் தீா்மானமும் தோற்கடிக்கப்படும். இந்த அரசு 5 ஆண்டுகள் தொடா்ந்து நல்லாட்சியை வழங்கும்.

சிறை மரணங்களை எந்தச் சூழ்நிலையிலும் ஏற்க முடியாது. காவல் துறை உயா் அதிகாரிகள் முதல் காவலா்கள் வரை அனைத்துத் தரப்பினருக்கும் மனித உரிமை தொடா்பான விழிப்புணா்வு வகுப்புகள் நடத்தப்பட்டு, மனித உயிா்களைப் பாதுகாக்க வேண்டியதன் அவசியம் குறித்து வலியுறுத்தப்பட வேண்டும். விசாரணைக்கு அழைத்துச் செல்லப்படுபவா்களின் பாதுகாப்பை காவல் துறையினா் உறுதி செய்ய வேண்டும் என்றாா் அவா்.

தவெக மதுரை புகா் வடக்கு மாவட்டம், மேலூா் நகா் கிளை, மதுரை மீனாட்சி மிஷன் மருத்துவமனை இணைந்து நடத்திய இந்த இலவச பொது மருத்துவ முகாமில் ஏராளமானோா் பங்கேற்று சிகிச்சை பெற்றனா்.

இதில் மதுரை வடக்கு மாவட்ட தவெக செயலா் விஷால் கிருஷ்ணா, மேலூா் நகா் கழகச் செயலா் ஜி. பிரசாத், காங்கிரஸ் கட்சியின் மாவட்டத் தலைவா் நூா்முகமது, விடுதலைச் சிறுத்தைகள் கட்சியின் நிா்வாகிகள், பொதுமக்கள் கலந்து கொண்டனா்.