இரு தரப்பினரிடையே முன்விரோதம்: பைக்குகளுக்கு தீ வைத்த சம்பவத்தில் 6 பேர் கைது

ராமநாதபுரம் மாவட்டம், சாயல்குடி அருகே எஸ்.மாரியூர் கிராமத்தில் இரு தரப்பினரிடையே முன்விரோதம் இருந்துள்ளது. இந்நிலையில், கடந்த 15 ஆம் தேதி இரவு 7 மணியளவில் ஒரு தரப்பினர், எஸ்.மாரியூர் கிருஷ்ணாபுரம் வடக்குத் தெருவைச் சேர்ந்த கருப்புளி என்பவருடைய இரு சக்கர வாகனத்துக்கு தீ வைத்துள்ளனர். 
   இதற்கு பழிக்குப் பழியாக, மற்றொரு தரப்பினர் ஒப்பிலான் சாலை கடைத் தெருவில் சக்திகுமார் என்பவருடைய இரு சக்கர வாகனத்துக்கு தீ வைத்துள்ளனர். இருவரது வாகனங்களும் முற்றிலும் எரிந்து சேதமடைந்துவிட்டன. 
   இது குறித்து தகவலறிந்த கீழக்கரை டி.எஸ்.பி. ரவிச்சந்திரன், சாயல்குடி காவல் ஆய்வாளர் ஜோக்கிம் ஜெரி தலைமையிலான போலீஸார் வழக்குப் பதிவு செய்து, வாகனங்கள் மீது தீ வைத்தவர்கள் குறித்து விசாரித்து வந்தனர். இந்நிலையில், செவ்வாய்க்கிழமை இரு சக்கர வாகனத்துக்கு தீ வைத்த ஒரு தரப்பில்  எஸ்.மாரீயூரைச் சேர்ந்தவர்களான வேலுமயில் மகன் சுந்தரமூர்த்தி (22), மாரிக்கிழவன் மகன் அஜித்(19) ஆகிய இருவரையும் போலீஸார் கைது செய்தனர். அதேபோல், மற்றொரு தரப்பில் எஸ்.மாரீயூரைச் சேர்ந்தவர்களான சோலையப்பன் மகன் அஜித் (18), தங்கப்பாண்டி மகன் முனியராஜ், சோலைமுத்து மகன் குமார் (16), குருசாமி மகன் குருராஜா (18) ஆகிய 4 பேர் என மொத்தம் 6 பேர் மீது வழக்குப் பதிந்து, போலீஸார் கைது செய்தனர்.